الغصن الوحيد
للكاتبة الإعلامية ندين نبيل عبد الله أبو صالحه.
قالوا لنا: أنتم غصن وحيد، لا أهل لكم، ولا ناس.
قالوها وهم مفكرين انهم كسرونا. قالوها وهم مفكرين أن الوحدة عيب، وأن اللي ما عنده أهل يعني ما عنده ظهر، وما عنده حدا يحميه.
بس اللي ما بيعرفوه، انه حتى لو كان عندنا أهل وناس، بنحس حالنا وحيدين.
لما يكونوا اللي حوالينا مش أهلنا، لما يكونوا هن اللي بيدبروا لنا المكايد، لما يكونوا هن أول ناس بيوجعونا، بنعرف وقتها أن الأهل مش بالاسم، الأهل بالفعل. الأهل مش اللي انولدنا بينهم، الأهل اللي الله سخرهم النا.
ممكن نكون يتامى، ممكن نكون وحيدين، بس الله معنا.
ولو كنا يتامى، كل الناس أهلنا. الله هو اللي بيمد لنا الخير، وهو اللي بيعطينا أحسن من أهلنا وأحسن من ناسنا. وربنا لما يعطي، بيعطي عطاء ما بيخطر على بال حدا.
الأهل مش كل شي.
ممكن يكون الصديق أحسن من أهل. ممكن يكون انسان غريب، ما بيعرفنا، بس الله سخره النا، يكون أحن علينا من دمنا. وربنا هو اللي بسخر الناس الكويسين، اللي زينا وعلى أشكالنا، الناس اللي قلوبها نظيفة، اللي بيجوا بوقتهم الصح، بدون ما نطلبهم.
الوحدة مش عيب.
الوحدة مش نقص. الله هو اللي بسخر الناس أهل لبعضيها البعض. اللي ما لقى أهل من دمه، الله بعوضه بأهل من روحه.
ومن عايرنا، كان في المرصاد لنفسه وليس لغيره.
اللي بيعاير حدا بوحدته، هو اللي وحيد من جوا. واللي بيقول “لن ينفعك سوى أهلك”، مقولته غلط. لأ الناس للناس، ولو كانت الأهل قاسية، الناس الحنونة هي الأهل.
نحن غصن وحيد؟ آه، نحن غصن وحيد.
بس غصننا مش مكسور. غصننا مرفوع للسماء، لأنه متكي على الله، مش على بشر.
واللي معه الله، عمره ما كان وحيد، حتى لو كل الدنيا تركته.
نحن مثل كرم الأوراق.
كرم الأوراق ما بيحتاج عنب حتى يكون كريم، كرمه بورقه، بظله، بعطائه. ورقه بيحمي، ورقه بيستر، ورقه بيطعم. هيك نحن، كرم أوراق، بنعطي من اللي عنا، حتى لو كان ورق، لأن الورق عندنا أغلى من العنب، لأنه طالع من تعبنا ومن صبرنا.
نحن ما بنموت وحيدين، نحن بنعيش بعوض الله.
والله إذا عوض، عوضه بيكون أكبر من كل اللي خسرناه.
