حين تعيد ترتيبك من الداخل
بقلم/نشأت البسيوني
في لحظة تبدو بسيطة لكنها في الحقيقة نقطة تحول تلاقي نفسك واقف قدام كل شيء جواك من غير خوف ومن غير تمني للهروب اللحظة اللي فيها تحس انك محتاج ترتب نفسك من الاول محتاج تشوف ايه اللي بيهدمك وايه اللي بيبنيك وايه اللي بيستهلكك وانت ساكت ومش قادر تعترف حتى لنفسك وتبدأ تراجع كل علاقة دخلت حياتك وكل موقف مر عليك وكل كلمة اثرت فيك من بعيد
لبعيد تلاقي انك كنت شايل فوق طاقتك وكنت بتسكت على اللي ما ينفعش يتسكت عليه وكنت بتدي من روحك لناس ما قدروش قيمتك وكنت بتضحك وانت متحمل وجع محدش يعرف عنه حاجة ومع المراجعة دي يبان لك الطريق اللي لازم يتقفل والطريق اللي لازم يتفتح يبان لك مين يستحق تكمل معاه ومين وجوده كان مجرد عبء يبان لك ان راحتك مش رفاهية وان قلبك مش ساحة
مفتوحة للكل وانك لازم تحط حدود حتى لو حد زعل حتى لو حد مش فاهم وتاخد القرار الصعب قرار انك تختار نفسك الاول انك تحافظ على هدوءك انك تبعد عن كل اللي بيشبه الضوضاء وكل اللي بيشوه وضوحك انك تدي اعتبار لمشاعرك وتوقف استنزافك وتتعلم تقول لا من غير ما تحس بذنب ومع الوقت تلاقي انك بدأت تتنفس بعمق اكتر وان خطواتك بقت اثبت وان نظرتك بقت اوضح
وانك بقيت اقرب لنفسك من زمان تلاقي انك ما بقيتش تلهث ورا حد ما بقيتش تستنى كلمة تطمينك ما بقيتش تتمسك بشيء يخسرك نفسك وتدرك ان اعادة ترتيبك من الداخل مش مرحلة مؤقتة لكنها بداية حياة انضج بداية علاقة صادقة بينك وبين ذاتك بداية فهم اكبر لحدودك وقدرتك وقوتك بداية طريق ما يخليكش تلجأ للسكات ولا الهروب ولا التنازل عن اجزاء منك تكتشف ان
اعظم انتصار تحققه مش انك تكسب الناس لكن انك تكسب نفسك وتعرف قيمتها وتبنيها من جديد بطريقة ما تهدمهاش تاني
