أقسى وجع إنك تتمنى رجوعها
بقلم/نشأت البسيوني
أقسى وجع مش إنك تفقد إنسانة بتحبها أقسى وجع إنك تفضل جواك أمنية رجوعها وأنت عارف إن الرجوع لو حصل مش هيكون زي زمان وإن الحكاية اللي كانت بتفرح قلبك بقت محتاجة معجزة عشان ترجع زي ما كانت ومع ذلك تلاقي نفسك أوقات بتتمنى تسمع صوتها وتلاقي رسالتها وتعيش لحظة واحدة من الأيام اللي كنت فيها مطمن لوجودها يمكن أنت ما بقيتش مستنيها زي الأول
لكن قلبك لسه بيشتاق ويمكن اللهفة خفت لكن الذكرى لسه موجودة ويمكن بقيت تقدر تعدي يوم كامل من غير ما تسأل عنها لكن في لحظة هدوء واحدة ممكن كل شيء يرجع قدامك كأن الغياب ما كانش كفاية عشان يمحو أثرها من جواك والأصعب إنك مش عايز لها غير الخير مش عايز تنتقم ولا عايز تشوفها ندمانة أنت نفسك تكون سعيدة ومرتاحة ويكون عمرها طويل وأيامها
هادية حتى لو كل ده بعيد عنك ودي يمكن تكون أقسى مرحلة في الحب إنك تتمنى للإنسانة اللي وجعتك كل الخير وأنت بتحاول تجمع نفسك من بعدها لكنك بدأت تفهم إن الحب مش لازم ينتهي بالكراهية وإن الفراق مش معناه إن المشاعر كانت كذبة وإن التعافي مش معناه إنك صحيت في يوم وما بقيتش تحب التعافي إنك تفتكرها من غير ما تنهار وتشتاق من غير ما تجري وراها وتسمع
اسمها من غير ما يضيع منك يوم كامل وإنك لو ما وصلتكش رسالتها تعرف تكمل ولو ما سمعتش صوتها تعرف تنام ولو غابت عن حياتك تعرف إن حياتك لسه فيها حاجات تستحق إنك تعيش عشانها يمكن في البداية كنت فاكر إنك مش هتقدر تعيش من غيرها لكن الأيام علمتك إن الإنسان أقوى مما يتخيل وإن القلب مهما اتوجع يقدر يتعلم الهدوء من جديد وأنا لسه بتمنى لها الخير
ولسه في قلبي مكان جميل لكل حاجة حلوة عشتها معاها لكني ما عدتش مستعد أخسر نفسي عشان أحافظ على حكاية انتهت يمكن لو رجعت في يوم هفرح ويمكن لو ما رجعتش هزعل لكني مش هقف مكاني مستني العمر كله لأنني فهمت أخيرا إن بعض الناس بنحبهم لدرجة إننا نتمنى لهم السعادة حتى لو لم تكن لنا وإن بعض الحكايات أجمل ما فيها إنها علمتنا كيف نحب وكيف نتألم وكيف نترك الباب مفتوحا للدعاء ونغلقه بهدوء أمام الانتظار
