اللحظة التي تغيرك
بقلم/نشأت البسيوني
في لحظة معينة من غير ما تكون مخطط ولا مستعد تلاقي الدنيا واقفة قدامك بشكل مختلف حاجة صغيرة تحصل كلمة تتقال موقف بسيط يعدي لكن يفضل قاعد جواك يقلب فيك ويقربك من حقيقة كنت دايما بتأجل مواجهتها تحس إنك فجأة شايف بوضوح حاجة وراء الأيام حاجة كنت مشغول عنها بنفسك وبالناس وبالركض اللي ما بيخلصش وتفهم إنك اتحولت من غير ما تقصد
وإن اللي استحملته زمان ما بقتش قادر تستحمله دلوقتي وإن الأشياء اللي كنت بتقبلها بسهوله بقت تقيلة على روحك وتبدأ تدقق في تفاصيلك الصغيرة في ردود فعلك في المسافات اللي بينك وبين الناس في كلامك اللي بقى أقل وصبرك اللي بقى أعمق وهدوءك اللي بقى جزء منك مش محاولة وتستوعب إن التغيير الحقيقي مابيجاش بضجة ولا لحظة كبيرة لكنه ييجي تدريجيا ييجي لما
قلبك يزهق من التعب ولما عقلك يشبع من الفوضى ولما روحك تقرر إنها ما ترضاش بالقليل اللي بيستهلكها وفي اللحظة دي تفهم إنك ما بقيتش الشخص اللي زمانه بيضغط عليه ولا اللي الناس بتحدده ولا اللي الظروف بتكسره تفهم إنك اتغيرت لأنك اضطريت تتغير لأنك اخترت تنجو مش تتأذى وتاخد قرار صامت إنك ما ترجعش خطوة لورا حتى لو الطريق قدامك مش واضح حتى لو
في ناس مش مستوعبة التغيير اللي حصل فيك حتى لو اضطريت تبعد عن كل حاجة كانت بتسحبك لورا تكتشف إن اللحظة اللي بتغيرك مش هي اللي حصلت لكن اللحظة اللي انت قررت فيها تاخد بالك من نفسك من احتياجاتك من حدودك من حقيقتك وإنك بعد اللحظة دي عمرك ما هتكون زي ما كنت قبلها
