الملامح التي تخبئ سراً وتكشف آخر
بقلم/مرينا حسن
في عالم الميك اب في حقيقة محدش بيشوفها لكنها أقوى من أي لون الحقيقة إن الوجه نفسه قبل الميك اب بيكون مليان قصص صامتة قصص محتوطة بين خط رفيع وتعب يوم طويل ولمعة عين مطفية بسبب موقف صغير أو جرح قديم والميك اب مش بييجي عشان يغير الحكاية دي لكنه بيجي عشان يكشف منها جزء ويخبي جزء تاني لأن مش كل حاجة تتحكي ومش كل حاجة لازم تتشاف
اللمسة الأولى دايماً بتكون أكتر لحظة فيها صدق لأن فيها الروح بتبان قبل اللون وفيها اليد بتوضح هي جاية تهدي ولا جاية تشجع ولا جاية تقول للوش اصحى من اللي حصل امبارح لحظة بسيطة لكنها بتغيّر اليوم كله وكأن الميك اب بيلمس نقطة جوا النفس مش جوا الجلد نقطة محتاجة ترتيب نقطة محتاجة خطوة جديدة نقطة محتاجة تطمن نفسها قبل ما تطمن حد تاني
الكونسيلر مش غرضه يخفي الهالات هو يخفي أثر سهر طويل ماحدش عرف سببه والهايلايتر مش لمعة شكلية هو ضوء صغير بيحاول يرجع للعين لمعتها اللي وقفت شوية والبلاشر مش لون على الخد هو نفس يتقال للروح ارجعي فوق تاني والروج مش تجميل هو إعلان ان في حاجة جوا رجعت تتكلم حتى لو الكلام لسه ضعيف
ومع كل تطور حصل بقى الميك اب أكبر من فكرة تحسين الشكل بقى مساحة إنسانية واسعة بتسمح للواحد يكون نفسه في يوم مش فاهم هو عايز يبقى ازاي مساحة تحميه من أحكام الناس وتسمح له يختار صورته بنفسه من غير ما حد يملي عليه ولا يجبره لأنه لأول مرة بقى الميك اب وسيلة مش للهروب من اللي جوا لكن لفهم اللي جوا
في وشوش كتير مش محتاجة ميك اب عشان تبقى أجمل لكنها محتاجاه عشان تبقى مفهومة لنفسها لأن فيه ملامح ساعات تبقى مش قادرة تحكي اللي حصل والميك اب بييجي يساعدها تشاور على اللي مش قادر يتقال مش باعتباره تغطية لكن باعتباره ترجمة ترجمة لإحساس كان ساكت وقرر يخرج فوق الجلد بدل ما يفضل جوه الرأس يعذب صاحبه
اللي محدش يخد باله منه إن كل مستحضر ميك اب له صوت صوت هادي لكن واضح الفاونديشن يقول اثبتي الكحل يقول انطقي الروج يقول ارجعي تاني الكونتور يقول اقفي صح كل لون بيحرك حاجة قبل الموقف وقبل اليوم وقبل العالم الميك اب مش مجرد شكل لكنه تشجيع داخلي مش بيبان غير على ملامح الشخص اللي حطه بإيده وهو مش واخد باله انه بيصلح نفسه قبل وشه
الميك اب مش ألوان تتحط ولا أدوات تتباع الميك اب مساحة صغيرة يقدر الإنسان فيها يرجع لنفسه يمكن مش ترجعه كامل لكن ترجعه واقف يمكن مش تغيره لكن تهديه يمكن مش تقويه لكن تفكره إن فيه جزء جواه لسه عايز يحيا وده يكفي عشان اليوم يكمل على أقل خسارة
