بتقلب جد
البُعد حد الذاكرة
ومفيش فضاء تاني
وعد القرنفل بالندى الغايب
طول عمره كان كدّاب
مين استباح الشوق
ورماه على الأعتاب من غير ما يتأسّف
سلّفني طعم الحنين لكن سرق راحتي
مين استعان بالزمن راهن على النسيان
وازاي يجيله قلب يدبح يمام الروح
هل كان ضروري نبتديها هزار
وفجأة تقلب جد ونفارق
سلّمت ليه قلبك لآخر دقّة
ووقفت ليه تستنى آخر زقّة
وانت لا ليك في الجدل ولا فـ زعل وخناق
بتحنّي قلبك عشانها خايف يبان الشيب
وبتلبس الألوان علشان تبان فرحان
مش كنت تصبر شويّة تراجع التفاصيل
الوقت كان سلحفة بس انت مستعجل
خلّيته ليه رهوان وركبته من غير سرج
وهي زي السراب بتفر مابتهمدش
وهي زي الخراب بينادي ع الوطاويط
تسكر بضعفك ولا عمرها ترتوي
لملم كسورك بقى
عشت الشقا مشنقة والطريق مقطوع
الدنيا فاضية عليك زي القميص الواسع
نبت المرار في القلب شوك وسعال
نبت المرار كان انتظارك فَشوش
النار دلوقتي أبرد من مشاعرك مرتين
والروح بتتهجّى الفراغ وتسب
الوحدة ما أجملها ومش غريبة عليك
والبُعد حد الذاكرة
ومفيش فضاء تاني (!)
……
بقلم الشاعر القدير : مصطفى الجارحي
من ديوان (اختفاء تدريجي من الكادر).
