تأجيل
بقلم/نشأت البسيوني
في أوقات كتير تلاقي نفسك بتأجل كل حاجة تأجل قرار مهم تأجل مواجهة لازم تحصل تأجل خطوة كنت عارف إنها هتفرق وتأجل حتى الكلام اللي جواك لحد ما بقى التأجيل أسلوب حياة مش مجرد اختيار مؤقت وتبدأ تلاحظ إنك كل ما بتأجل بترتاح لحظة لكن القلق بيفضل موجود وإن الحاجة اللي هربت منها بترجعلك تاني بشكل أتقل وكأنك بتدور في نفس الدائرة من غير خروج
وتسأل نفسك ليه بتأجل ليه بتخاف تاخد خطوة ليه بتستنى الوقت المناسب رغم إنك عارف إنه مش هييجي ليه بتقنع نفسك إن بكرة أحسن وانت كل يوم بتبعد أكتر ومع التفكير تكتشف إن التأجيل مش كسل زي ما كنت فاكر لكنه خوف خوف من النتيجة خوف من الفشل خوف من إنك تتحمل مسؤولية اختيارك وخوف من إنك تواجه حاجة ممكن تغير حياتك وتفهم إنك كنت بتختار الراحة
المؤقتة على حساب راحة طويلة وإنك كنت بتهرب من لحظة صعبة علشان ما تعيشش الحقيقة كاملة وإنك كنت بتأجل حياتك مش مجرد قرارات وتيجي اللحظة اللي تقرر فيها إنك تواجه تاخد خطوة حتى لو صغيرة تقول الكلام حتى لو متردد تبدأ حتى لو مش جاهز وتكتشف إن أول خطوة كانت أصعب حاجة وبعدها الطريق بيبدأ يبان وتحس إنك بدأت تتحرر من الدائرة دي وإنك
بقيت أهدى لأنك بطلت تهرب وإنك بقيت أقوى لأنك بتواجه وإنك بقيت أقرب لنفسك لأنك بقت اختياراتك حقيقية مش مؤجلة تفهم إن التأجيل بيأكل من عمرك ومن فرصك وإن الحياة مش بتستنى حد وإنك طول ما بتأجل هتفضل واقف لكن أول ما تبدأ حتى بخطوة بسيطة كل حاجة بتتغير
