تقييمك للناس هو انعكاس لزاوية نظرتك، غيّر زاويتك تتغيّر صورهم.
بقلم : محمد حسني محمود
ساعات إحنا بنشوف الناس مش على حقيقتهم، بنشوفهم من خلال مرايتنا إحنا.. لو المراية مش نظيفة، الصورة مش هتبان صح.
الفكرة اللي في دماغك عن حد، ممكن تظلم بيها الشخص قبل ما تديله فرصة يبين نفسه…اللي قلبه مليان ظنون، هيشوف كل الناس مش كويسين، حتى لو فيهم خير… قبل ما تحكم على غيرك، بص جواك: هل إنت شايفهم ازاي، ولا بعين مجروحة أو متعبة؟او بها مشاكل نفسيه انت على علم بها كن عادلا في النظر الى الناس.
الخير والشر حوالينا، بس إحنا اللي بنقرر نشوف إيه أكتر.فلو لقيت نفسك شايف الكل غلط فراجع نفسك داخليا… إحنا ساعات بنظلم الناس من غير ما ناخد بالنا، مش عشان هما وحشين، لكن عشان إحنا لسه محبوسين في تجربة قديمة أو جرح لسه ما لملمش. تلاقي حد بيتكلم بطريقة معينة، إنت على طول تفتكر حد كان بيأذيك بنفس الأسلوب، فتقيمه غلط وتاخد انطباع مش حقيقي..
الحقيقة إن كل إنسان ليه حكاية، ليه ظروف، ليه عالم جوا عقله. وإنت مش هتعرف تشوف ده بوضوح غير لو رتّبت أفكارك الأول. لو قلبك نظيف، هتلاقي نفسك بتشوف الخير أسرع من الشر. ولو دماغك صافية، هتفهم الناس قبل ما تحكم عليهم.
جرب تغيّر زاوية نظرتك، يمكن تلاقي فيهم نور ما كنتش واخد بالك منه..في ناس بنفتكرهم قاسين، لكن يمكن إحنا اللي محتاجين نلين جوا شوية.
مرات اللي بيتقال “عيب في الناس” بيكون انعكاس من جواك إنت مش واخد بالك منه.
تقييمك للناس هو انعكاس لزاوية نظرتك، غيّر زاويتك تتغيّر صورهم.
