حدود لا ترى
بقلم/نشأت البسيوني
في لحظه معينه هتحس إن في حاجات كتير حواليك بتتصارع من غير ما يكون ظاهر عليك إنك بتتأثر بيها لكن جواك في حاجه بتتهز كل ما تحاول تبين انك ثابت وسط كل التغيرات اللي حوالينا واللي بتحصل بسرعه أكبر من قدرتك على الاستيعاب ويمكن اكتر حاجه صعبه انك تلاقي نفسك واقف في مساحة مش واضحه بين اللي انت عايزه واللي انت مضطر تتقبله وبين اللي فقدته واللي لازم
تكمل بعده وتبدأ تفهم إن حياتك دايما بتتحرك على حدود خفيه حدود ما حدش يقدر يشوفها غيرك حدود بين خوفك وشجاعتك بين ضعفك وقوتك بين الصمت اللي بيحميك والكلام اللي بيحررك ويمكن أصعب حد فيهم هو الحد اللي بيحدد انت مين قبل ما تحدد أنت رايح لفين ومع كل يوم تعدي تكتشف إنك بتكبر من غير ما تاخد بالك وانك بتتغير من غير ما تكون ناوي على التغيير وانك
بتتعلم رغم إنك مش دايما جاهز للتعلم وتبدأ تلاحظ انك ما بقيتش نفس الشخص اللي كنت عليه من شهور ويمكن حتى من أيام والحياه نفسها ما بتديكش فرصه تستوعب اللي حصل بتاخدك لقدام غصب عنك كأنها بتقولك ان الرجوع مش خيار لكن رغم كل ده في جواك حاجه بتفضل ثابته حتى لو ضعفت شويه حاجه بتفكرك إنك قادر تكمل وقادر تواجه كل الحدود اللي بتحاصرك
حاجه شبه صوت داخلي هادي يمكن ما تسمعوش غير في آخر اليوم لما الدنيا تبقى ساكته والهموم مهديه وتقول لنفسك إنك لسه قادر رغم كل اللي وقع منك ولسه عندك مساحه تبني فيها حلم جديد حتى لو كنت فاكر إنك فقدت الشجاعه وفي الآخر تفهم إن الحدود اللي كنت فاكرها قيود ما كانتش حاجه تمنعك بالعكس كانت خطوط بترسم ملامح الطريق اللي جاي طريق انت يمكن ما
خططتش له لكنك مؤهل إنك تمشيه وإنك في اللحظه اللي هتشوف فيها الحد بوضوح هتدرك إن كل حاجه مرّت عليك كانت بتجهزك علشان تتخطاه
