ذكريات رئيس – بقلم العابد عبد الرحيم
———————/
(كم احب هاته المدينة، لا اعرف لماذا…! ربما لان الطيور
قد هجرتها منذ زمان؛ ربما لاني احن لأنين الناس….كما
احن لأنيني.. لقد باتت السنابل سنابلا بدون حبات قمح.
لا زلت انتظر واتحرك كي اغير مكاني لكن هيهات هيهات)
————————————————————————-
/ رشني بالدرهم نفرح
“””””””””””””””””””””””/
(زجل)
رشنا بالدرهم لعل و عسى
فوسخنا من حانوت العطار
غير شوف الشبة و الحرمل
بخرنا ببخور خانز جيفة
بخرنا ببخور خانز عطعاط رطب القلب رشنا شوية
*رشنا باالدرهم لعل وعسى
ترجع الفرحة للقلب ساعة!
يمكن ننساو الماضي القريب
ننساو ازمانك ازمان المحنة
منقوش على صخور لجبال
منقوش راسخ عار وسيئات
*ما ايزول ولو انشربو شراب الدنيا!
واااااالغمة تاابعة غمة
او
الجبال عليك شاهدة
لبسنا قشاب اجديد
ايكون ابيض ساطع
ايكون أبيض ناصع.!
لبسنا تشامير العيد
الصباح
صباحك يا مولاي.! لفجر طالع بالمحنة
الفجر ودع النجمة.!
او باقي باقي نفس الحال.!
لا اتقول لي….مبروك العيد
تعطي بالدرهم اتشوف ابعيد
علاش اتضيقنا في الضيق؟
خط مقطوع ينهي الطريق
خط الطريق الخط الطويل
قصر مع شيخات ااالليل!
الامل قليل…. او…. ضئيل!
خط ايفكرنا فالمحيط
غير خليك راجل عربيط
خليك حلو قوالب سكر
*فكر فينا بالفن فكر فينا قبل اتطيح.!
أمر كَرابك يروي العطشان
غير دوخنا دوخة يا فلان
*يمكن تشري فينا ااالسكران!
يمكن تشري اصحاب النعناع! اصحاب اااااااكتامة بالعلالي!
* راه الحشة قتلت كبير .!
* راه الحشة قتلت صغير.!
يا لفقيه اجي اجي تزرد
خويا الفقيه بويا صالح
يا صاحب لقلم و اللوحة
*يا الفقيه يا بن عمي…يا الفقيه اجي تشهد.!
= كان موسم ولى حركة=
اجي اتشوف راني مسلوخ
*سلخوني سليخ ااااانلكنفود
مازال الضغط يخنق لنفاس
ما زال الفاس يضرب ضربو
كل فاس ليه نغمة و انغام.!
هذي البداية و اللا نهاية.؟
مبروك عليك يا مدينة
مبروك الخصة ازوينة
مبروك الجردة الخضرة
*بدلوا البصلة….بالعنصل
(بدلوا الزيطي بالريطي)!
لا مزرار لا كراطة تنفع
ربي امر خيولنا تنطح
عادت لكلاب فينا تنبح
هربنا من الموسم جري!
هنا ضاع الريال الاول
هنا لعبو عليه اللعبات
هنا طاح الريال الثاني
قالوا لينا شطحو عليه
انحفرو الشارع الاول
انحفرو الشارع الثاني
انحفرو لمدينة بالكامل
انحطمو لحيوط الشاهدة!
مشاريعنا اكثيرة واجدة
الى اسرح بنا الخيال مرة
غير ساعة…….ساعة يتلف
لفراجة……فيكم اليوم
ركبوا خيل واللا كلخة!
*انحركو تحراك الخيل العرجة!
*فلوسنا شعير تبن او دخان للتبوريدة.!
فلوسنا اجنان واهدية السيدي بونوالة.!
يا رايس كثرت لمواج راه لفلوكة مايلة!
كعد الميل دير الكالة
يمكن تغرق الشضفة!
* اش من خطة اتليق لمواج باقية.!
فين هارب يا منطيح شد الحيط لا ايطيح
كان موسم ولى حركة
واش غفلة واللا خلعة؟
سار لخوى يلعب لعبو
( من ذكريات رئيس)
