صمت لا يراه أحد
بقلم/نشأت البسيوني
في لحظات كتير وسط الضوضاء والزحمة تلاقي نفسك محتاج مساحة هدوء ترجع فيها تسمع صوتك اللي اتغطى تحت طبقات من المسؤوليات والضغوط والمجاملات اللي بتقولها غصب عنك علشان تكمل اليوم بشكل سلس قدام الناس بينما جواك حاجة مختلفة
وتقعد تتساءل امتى كان آخر يوم حسيت فيه إنك صادق مع نفسك من غير ما تزود ولا تنقص من حقيقتك امتى آخر مرة سمحت
لمشاعرك تبان من غير ما تخاف من ردود فعل الآخرين امتى آخر مرة اعترفت لنفسك إنك تعبت وإنك محتاج توقف وتبدأ تفهم إن الصمت مش هروب ولا ضعف الصمت مساحة بتجمع فيها شتاتك مساحة بترتب فيها اللي اتبعثر منك مساحة بتخليك تشوف اللي كنت مش شايفه وسط السرعة والضجيج والوجوه اللي بتعدي كل يوم من غير ما تسيب أثر ومع الوقت تلاقي إنك أصبحت تميل
للسكينة أكتر تميل للكلام القليل اللي ليه معنى وللوجوه اللي مش بتتغير وقت الشدة وتعرف إنك مش محتاج تشرح نفسك لكل حد لأن اللي بيحبك بجد بيفهمك من غير كلام كتير تكتشف إنك مهما حاولت تسبق الأيام أو تلهي نفسك عن اللي جواك هترجع دايماً للهدوء اللي بتبني فيه صوتك من جديد لأن أقوى نسخة منك بتتخلق في لحظات الصمت اللي محدش شايفها غيرك
