عابر سبيل
محفورة أصلًا سِكّته
من مهده حتى تربته
فـ سنين ضلام متعتمة
من غير دليل…
منحوتة فكرة بهجته
فوق الحيطان
محبوسة والليل ديدبان
ملهوش عزيز ولا أمان
رافض تكون الفكرة
على وش السبيل
مانع حدود الفرحة
ومخبي الدليل..
فرعون أصيل..
قبل أما رُوحك تخسرك
قال ايه بنفسه يخيّرك..
ياتعيش في صمت و مسكنة
يا تموت في لحظة بدون عويل
هو أنت مش عابر سبيل؟…
يعني تموت والاسم حي
يعني المرار ف العتمة ضي
تنسى اللي فات من سكتك..
وتبيع كمان كل اللي جي…
ماتقولش أي…
ولا صرخة تخرج من وجع
ممنوع تقع..
أو حتى تيجي تشتكي..
أو تعمل الواد الشقي
اللي فـ حديدهم راح يفوت..
ركز فـ طبقك واتلهي..
هتلاقي غارفينلك سكوت..
عدي اللي فاضل… يلا فوت
اعبر سبيلك من سكات
إياك تحط ف يوم شروط
حط النهاية لـ رحلتك
ما مسيرها تيجي محطتك
وإن سألوا يوم عن كُنيتك.. هنقولهم
عابر سبيل..
