فائض الوعي
بقلم/نشأت البسيوني
في مرحلة ما من حياتك تكتشف انك بقيت شايف اكتر مما ينبغي فاهم اكتر مما يريحك ومدرك تفاصيل ما كنتش محتاج تدركها في الوقت ده الوعي اللي كان المفروض يطمنك بقى تقيل عليك يخليك تفكر في كل حاجة مرتين وتحلل كل كلمة وتعيد كل موقف لحد ما تفقد بساطته وتبدأ تلاحظ انك بقيت متعب من كتر الفهم متعب من انك شايف اللي ورا التصرفات واللي ورا الكلام واللي ورا
الصمت حتى بقيت تقرأ الناس بسهولة لكن ما بقيتش مرتاح وسطهم لان المعرفة الزايدة بتفقدك دهشة العلاقات وبتخليك تشوف النهاية من البداية وتسأل نفسك هو ده نضج ولا عبء هو انا بقيت واعي ولا بس تعبت من كتر ما فهمت يمكن تكتشف ان الوعي سلاح بس مش دايما مريح وانه محتاج توازن لان اللي يفهم كل حاجة ممكن يفقد القدرة على التعايش مع ابسطها ومع الوقت تفهم
ان مش كل حاجة محتاجة تحليل وان في حاجات لازم تعدي زي ما هي من غير ما تفتحها ومن غير ما تفسرها وان راحة البال مش في انك تفهم كل شيء لكن في انك تختار ايه اللي يستاهل تفهمه وايه اللي تسيبه يعدي وتلاقي نفسك بتحاول تخفف عن عقلك تبطل تحميل كل موقف معنى اكبر من حجمه وتدي لنفسك مساحة تعيش اللحظة بدل ما تراقبها وتفهمها وتفككها وتفقدها معناها الحقيقي
تدرك ان فائض الوعي ممكن يبقى هدية لو عرفت تتحكم فيه وممكن يبقى عبء لو سيبته يتحكم فيك وان الحكمة مش في انك تعرف كل شيء لكن في انك تعرف امتى توقف تفكيرك وتسمح لنفسك تعيش ببساطة
