“لوكان!….”
بقلم: أسماء خوجة
لوكان بعقلو لبريق
مايعطي وجهو لحريق
أولوكان الغافل ايفيق
اوالمكفي على ظهرو يعيق
لوكان لقمرة تضوي الليل
والحق يتعرى مالتضليل
لو كان القلب يشوف
مايغلط فـ طيب الصفوف
ولا يرضى يعيش مكشوف
وسط ذياب بلا خروف
ولوكان الجاهل يتعلّم
ما يزرع سمّ وسط الحلق
ولوكان الظالم يتألم
كان يحسّ بآلام الحرق
كل ظالم أكيد غيندم
والحقيقة تاليتها تتكلم.
وهذا هو حال الدنيا الفانية
تعطيك وتاخذ منك فثانية
دوارة أوكل واحد تغرفلو حقو
وكل حي فيها على الله رزقو
فلا تغركوم الحياة بلوانها
راه متضحك غير للي صانها
واللي طمع فمكتاب غيرو
يحرم حلالو
ويضيع خميرو
فخلي قلبك ديما نقي ورضا
وكول رزقك بلحلال ولو ڨرضة
ماتغش،ماتحسد،ماتبكي عالقلة
واحمد الله انو عفاك مالمرض والعلة
واللي خلاها عالله عمرو مايخيب
سبحانه ديما نصير للمظلوم ولغريب.
