مخرج
بقلم/نشأت البسيوني
في لحظة معينة تكتشف انك محاصر مش بس من الناس ولا من الظروف لكن من نفسك من افكار اتعودت تعيش فيها ومن خوف اتربى جواك لسنين ومن حدود حطيتها بإيدك وانت فاكر انها حماية لكنها في الحقيقة كانت سجن كبير انت اللي بنيته لنفسك خطوة خطوة وتلاقي انك كنت بتدور على باب للهرب طول الوقت بس من غير ما تبص حواليك وتشوف ان الجدران اللي حابسينك مش اقوى
من قرار واحد تاخده قرار انك تبطل تكون نسخة صامتة من نفسك تبطل تمشي في طريق ما يشبهكش تبطل تضحك علشان تخبي وجعك تبطل تبرر وجودك لناس ما سألوش عنك يوم وتبدأ تشوف ان الحياة مش واقفة عند خذلان ولا انهيار ولا غياب وانك انت اللي واقف ومش قادر تتحرك لانك صدقت ان ما فيش فرصة تانية وصدقوك انك مش قد التغيير وصدقهم صوتك الداخلي لما تعب
من الشكوى وسكت ومع الوقت تلاحظ ان روحك بتدق على الجدار اللي بانيه جواك كأنها بتقولك امشي بقى كفاية خوف كفاية صبر كفاية تنازلات مشيت كتير من غير ما تسأل نفسك انت عايز ايه مين جنبك بجد ومين كان عبء عليك ومين كان مجرد مرحلة
وتقرر في لحظة هادية جدا انك هتخرج من كل اللي حاصرك من كل اللي استنزفك من كل اللي علقك في نص الطريق من كل علاقة
اتبنت على ضعفك وكل حلم اتأجل لحد ما بهت وكل عادة خدت من عمرك اكتر مما تستحق وتبتدي رحلة جديدة مش فيها ضجيج ولا اعلان مش فيها حد يشجع وحد يحبط رحلة تأسس فيها نفسك من اول وجديد رحلة تشيل منها الوجع وتحط مكانه وعي تشيل منها الخوف وتحط مكانه تجربة تشيل منها الناس اللي كسرتك وتحط مكانهم اللي يعرفوا قيمتك وتحس وقتها ان الهواء اتغير ان عينيك
بقت اوضح ان خطواتك بقت ثابتة حتى لو الطريق مش باين كله قدامك تحس انك ماشي لأول مرة باتجاه له معنى باتجاه يشبه قلبك مش الناس مش العادات مش اللي اتعودت عليه تفهم ان المخرج مش باب تفتحه لكن قرار تاخده وانك اول ما تختار نفسك بصدق هتلاقي الحياة كلها بتتشكل حواليك من جديد بشكل ابسط وأنضج وأقرب لروحك اللي بترجع من تحت الرماد واحدة واحدة
