مش كل بيت فيه أب… فيه أمان
بقلم: دعاء شعبان
من سلسلة: وجع في المجتمع
في بنت ممكن يكون أبوها عايش معاها تحت سقف واحد…
لكنها عمرها ما حسّت إنها عندها أب.
موجود وقت الأكل، موجود قدام التلفزيون، موجود في المناسبات…
لكن لما تخاف، تدور على غيره.
ولما تتكسر، تخبي وجعها.
ولما تحتاج كلمة أمان، تفضل ساكتة.
الأب مش مجرد شخص بيدفع مصاريف البيت.
الأب كلمة: “أنا جنبك.”
حضن وقت الخوف.
ظهر وقت الانكسار.
وصوت يقول لبنته:
“محدش يقدر يقلل منك طول ما أنا موجود.”
في بنات كبرت وهي بتدور على الأمان في كل شخص تقابله…
لأنها ما لقتوش في المكان اللي كان المفروض تلاقيه فيه.
ومش معنى إن الأب موجود جسديًا إنه حاضر فعلًا.
أحيانًا أصعب أنواع الغياب… إن الشخص يكون قدامك، وقلبه مش معاك.
علشان كده، قبل ما نحاسب أولادنا على تصرفاتهم، نسأل نفسنا:
إحنا اديناهم الأمان الكافي علشان يعرفوا يواجهوا الدنيا؟
يمكن طفل واحد يقرأ الكلام ده النهارده…
ويقرر لأول مرة يروح يحضن أبوه.
ويمكن أب يقرأه…
ويدرك إن أولاده مش محتاجين منه فلوسه بس.
محتاجين وجوده.
دعاء شعبان
وجع في المجتمع… بنحكي الوجع اللي محدش شايفه.
