مش هـ -اسامح
بقلم / مايسة إمام
أنا مش عار ولا سُبَّة وعيبة
ولا باصمة في جبيني الخيبة
أنا مش ناقصة عقل ودين
وشيطاني عاملي تركيبة
ولا عندية ومستقوية
وأفكاري كلها خرِّيبة
مش إني مطلقة دي مصيبة
وكل مافي في شك وريبة
أنا إنسانة ولي مشاعر وبحس
بكل تعذيبه
أنا كان نفسي اتحب وأحب
وأسكن جوا حبيبي قريبة
أنا كان نفسي يكون لي سند
القاه في ضهري في ليلة عصيبة
واغمض عينه في أحضانه
وارمي حمولي وأنا معصوبة
اسقيه من حبي وحناني
تطرح أرضه مودة وطيبة
ليه دايسني بكل قساوة
ليه مش شايفين إني ربيبه
ليه مربوطة حياتي براجل
يمنح ،يمنع وأنا مغصوبة
ليه اتشاط كدا صد ورد
زي الكورة أكون مضروبة
مش ذنب ولا كبيرة عملت
إني صرخت وقلت غريبة
أيوه وسط الناس أنا حاسه
إني زرعة في طينه غريبة
وعيون الكل بتقول
رافصة النعمة يادي العيبة
ناقصة رباية وليها حكاية
وأكيد سرها حاجة كئيبة
أنا مش عار ، عاوز يتواري
ويخبوه هاتوا الخبيبة
أنا حقي وسطيكوا أعيش
من غير رفض و من غير غيبة
واللي يقول علي شرع الله
مش موجود عندنا …دي رهيبة
ذنب حياتي وحتى مماتي
في رقبته ليوم التغريبة
مش راح أسامح ، مش راح أقول
مسكين كسره شعر الشيبة
