مطلوب عريس _ بقلم الشاعرة رشا عبد المنعم
إزيك يا أبويا
واحشني ياطيب
طمني على الأخرة هناك
وإيه أحوال إللي راحوا معاك
عساهم بعافيه
وصحه تمام
أنا كنت لسه بحضر نفسي للزفه
فجأه لقتني تايهه
لا أنا ماشيه ولا واقفه
ولا جايا ولا رايحه
مين فينا يقدر يخالف
شرع الحياه قاسيه
من سنين وانا لسه حافظه
إن انام وقت ماتنام الكتاكيت
واخبي دمعي تحت الوسايد
واسمي بالله الحفيظ
يحفظني شر العفاريت
وآكلي حتة جبنه بيضا
والم من الصحن إللي فايض
ما إنت عارف
إن والنعمه الشريفه
لسه إسمي طوق حرير فوق الشفايف
ما نفعتش ابقى مهره عارجه
يركبوها للي خايف
لا ناقصه رجل ولا ناقصه إيد
وأنا يوم ما يخطبني الهايف
والله هرفض بالثلث
انا بنت حره من ضهر راجل
على كيفي انقي
من بين خلايقه العارفين
واشرط عليه يجبلي أحلى عقد لولي
ويلف جسمي بالياسمين
هو كدا
إن يعجبه اهلا وسهلا مرحبا
وإن قص حته من الكلام
الباب يفوت حضرته
يخرج حمار
يدخل حمار
إيه المشكله؟!
من الف عام
وانا لسه بستنى نصيبي وقسمتي
أنا نفسي اجيلك يابا لابسه دبلتي
وامي تزغرد زغروطه عاليه في المنام
لأجل إن ارتاح في تربتي
رشا عبد المنعم
