من ديوان الدايرة دارت.. لخالد الجمال قصيدة ( ظنك أيه ؟ )
من ديوان الدايرة دارت.. لخالد الجمال قصيدة ( ظنك أيه ؟ )
من ديوان الدايرة دارت.. لخالد الجمال
قصيدة ( ظنك أيه ؟ )
……………….
ظنك أيه يا بنت الليل
عيونك تضحك مرة وتبكي
دبلت فيا معاني كتيرة
وبقيتي سيرة
سيرة وسيرة
خوفت لقلبي لحظة يميل
وابقي أسير الفهم الغامض
راضي بحالي
وليه اتحدي بكرة وبعده
هو امبارح وفا بوعده
ظنك أيه … ؟
احكي حكايتك في الحكايات
وارضي أكون من الأموات
لما الميت فضي حروفه
وموت خوفه
بأي لسان هيدافع عنك
روحه بتصرخ علي أعتابك
وأنت يا قادرة فايتة الصرخة
تلم حروف كل الحكايات
وتبقا سراب الوهم الساكن
جوه قلوب ملهاش بدايات
ظنك أيه … ؟
تلعبي بيا والعب بيكي
لعبة جديدة
أول مرة تمر عليا
وتبقي الآمرة فيها وناهية
أمرك نافد غصب عني
كل ما أغمض عيني ألقاكي
فاتحة عنيكي تبصي عليا
ظنك أيه … ؟
تبقي الباقية
ما هو أنت الباقية
وأنا متلصم فيكي بعافر
قبل ما يجي يوم وأسافر
أسافر منك . منك ليكي
وأنا ممدود البال وبخاطر
ظنك أيه …. ؟
تعشقي قلبي
وأعشق قلبك
كل كلام العشق باعوه
قتلوا الحب يوم وخانوه
مسحوا الماضي لما نافوه
واللي يحب بجد عادوه
ظنك أيه … ؟
هو أنا عايش ف المخصوص
أمد الإيد وأعبي فلوس
دا أنا مش لاقي اللقمة الناشفة
أقدمهالك تحيني بيها
وتلميني تحت جناحك المكسور
ظنك أيه … ؟
أصرخ و أثور
عمر الظن ما كان في محله
واللي يحله عاش مجنون
ظنك أيه …؟
تأليف الأديب الشاعر والسيناريست/ خالد الجمال
