الشعر

ياريتني ماسمعت

ياريتني ماسمعت

الشاعر/عاطف محمد

هى الحروف مالها
مابقتش بتطاوع
100مره انادى عليها
اطرش ومش سامع
حتى الكلام اتدارى
ورا حيطان جامع
مثل فى دور شحات
عايش قسى الواقع
هبب ف وشه وقال
أنا صوتي مش طالع
طب ما أنت أهه بتتكلم
جواب وله طابع
مستني أيد بوسطجي
يوصل القاطع
نسيت أمر الكلام
وقعدت أنا متابع
وياريتني يوم ماتابعت
مخاليق بدون وازع
مات الضمير فيهم
وراح ماهوش راجع
أدي حد واكل حرام
وياريت كمان قانع
وبنت لبسه الملام
مش حبه تتمايع
قالوا عليها قفل
مفتاحه قال ضايع
وأدي كبير ف السن
مافيش ايدين رحمته
والكل كان ساقع
وأدي ست ف العكننه
تاخد جوايز أوسكار
بيمين ماهوش راجع
عايشه فى ضل راجلها
زي القطط تنكر
وتقول ماهوش دافع
وزوج بقى مقضيها
قعدة قهاوي وبس
وطاولة ع الساقع
وبيته مش ف دماغه
عايش كما الصايع
قايم بدور البصل
حشري مايتراجع
لبلاب على الشبابيك
لكل شىء قاطع
ورزيل كلامه سم
بيسمم النافع
فارض رزاله سد
بلون غميق فاقع
قاطع حبال الود
على رصيف شارع
يانهار مال… هوش ملامح
وقعت م السابع
يظهر بأني خلاص
بنزيني مش نافع
أصلي سمعت كتير
وكأنى مش سامع
حاسس بأن الروح
مضروبه بمدافع
متفرقه أشلاء
ف يوم مافيش مانع
يمزوا فيها بشغف
مع فيلم بمقاطع
معمول بلغة الخرس
مع سواد باقع
بصيت شمال ويمين
قالوا لى …..ده الواقع

مقالات ذات صلة

اترك تعليقاً

لن يتم نشر عنوان بريدك الإلكتروني.

شاهد أيضاً
إغلاق
زر الذهاب إلى الأعلى