استعادة….
بقلم/نشأت البسيوني
في لحظة معينة تحس إنك فقدت حاجات كتير من غير ما تاخد بالك فقدت شغفك في حاجات كنت بتحبها فقدت راحتك في أماكن كنت بتحسها وطن فقدت صوتك وسط ضجيج الناس فقدت ملامحك الأصلية اللي ضاعت مع السنين ومجهودك اللي اتوزع غلط وتبدأ تسأل نفسك أنا ازاي وصلت هنا ازاي سبت نفسي تتغير بالشكل ده ازاي صدقت إن التعب طبيعي وإن الضغوط عادية وإن
الاستنزاف جزء من اليوم وإن الوحدة اختيار وإن الصبر دايما حل
ومع كل سؤال تكتشف إنك فضلت تحارب علشان ناس ما فهمتش قيمتك وفضلت تتنازل علشان علاقات ما فضلتش تسند وفضلت تتحمل علشان مواقف ما كانتش تستاهل نص اللي قدمته وإنك فضلت تأجل نفسك لحد ما نفسك اتأجلت فعلاً ومع الوقت ييجي الإحساس اللي يصحيك الإحساس اللي يقولك إنك محتاج ترجع
لنفسك وتستعيد الجزء اللي ضاع وتلملم حكاياتك من جديد وتفهم إنك تستحق حياة أهدى من كل اللي عشته وتبدأ أول خطوة خطوة بسيطة لكنها مهمة خطوة فيها رفض للاستنزاف وفيها قبول للراحة خطوة فيها اختيارك الحقيقي لأول مرة بعد ما كنت دايمًا بتختار اللي يريح الناس مش اللي يريحك ومع كل يوم تعدي تحس إنك بترجع بالتدريج إنك بتعرف نفسك تاني إنك بتتعامل مع قلبك
بليونة أكتر إنك بتسمع صوتك اللي كان ساكت وإنك بتتعلم توقف خساراتك قبل ما تكبر وتدرك إن الاستعادة مش رجوع للماضي ولا رجوع لنسخة قديمة لكنها رجوع لحقيقتك اللي اتغبرت من كتر ما ضغوط الحياة غطتها وإنك لما تستعيد نفسك تبدأ تشوف الدنيا بشكل أعمق وتختار بعقل أهدى وتحب بقلب أوعى وتكمل بخطوات ثابتة تفهم إن الاستعادة مش رفاهية لكنها ضرورة وإنك علشان
تستمر لازم ترجع لنقطة الأصل نقطة الهدوء الداخلي اللي كل حاجة بعدها تبقى أوضح وأخف
