لما تحس انك اتغيرت من غير ما تقصد
بقلم/نشأت البسيوني
في لحظة معينة تلاقي نفسك مش نفس الشخص اللي كنت عليه من فترة قصيرة من غير ما تعمل خطة ومن غير ما تعلن بداية جديدة لكنك تتفاجئ ان ردودك اهدى وان زعلك اقل وان الناس اللي كانت بتوجعك ما بقتش تقدر تلمسك زي الاول التغيير ده بيجي من تراكم وجع تراكم خيبات تراكم مواقف علمتك من غير ما تاخد بالك علمتك تختار وتفهم وتحسب خطواتك بدل ما تجري ورا
كل شيء وتبدأ تحس ان الكلام اللي كان بيستفزك بقى عادي وان اللي كان بيقلب يومك مش فارق وان الحاجات اللي كنت بتجري وراها ما بقتش تهمك زي زمان كأن روحك كبرت فجأة وتسأل نفسك انا اتغيرت ليه وانت عارف ان الاجابة بسيطة لانك اتعلمت
ولان الحياة علمتك بالصبر وبالصدمة وبالخسارة وبالناس اللي كانوا قدامك مجرد شكل من غير مضمون وتبدأ تفهم نفسك اكتر وتقرب
من اللي بيهتموا فعلا وتبعد من غير خوف وتسكت من غير ضعف
وتغلط من غير ما تكره نفسك وتلاقي سلام داخلي ما كنتش تحلم توصل له سلام بيقولك انك فوق ما كنت فاكر وانك اقوى من كل اللي عدى عليك وانك ما بقيتش نفس النسخة اللي كانت بتتوجع وتسكت وتتحمل لانك ببساطة اتغيرت وبقيت اصدق واوضح
واخف وبقيت اقرب لنفسك من اي وقت فات
