عرايس خشب
عرايس خشب
ف إيد الشيطان
لسان الخيوط
خيوط من لسان
بتغزل كفن ف الكلام
تشكل حوار اللئام
عرايس خشب
ف إيد الشيطان
ولا ليها شكل
ولا ليها قيمة
عرايس قديمة
عيون ميتة
عيون من خيوط
لسان من قماش
لسان إخطبوط
بيخنق بأمر الشيطان اللى ماسك في ايده الخيوط
ملامح ورق
ورق من ملامح
عليه الطلاسم
جروح المواسم
ف صيد الحيتان
عرايس خشب
ف إيد الشيطان
زعيم العرايس
خشب من كافور
ومحفور رصاصة
مكان العيون
عيون الدجل
مفيش الا واحدة
يشوف الخشب والخيوط والحبال
وتعمى العيون عن عيون الكمال
عروسة خشب
من زمان الزمان
عروسة حطب
ونظارة فوق مسمارين العيون
عجوز الدناءة البذاءة الجنون
جحوظ العيون
يَخوِّف عيال الترع في البراري
عروسة قديمة
خشبها نفش وانتفش في المجاري
عرايس خشب
في إيد الشيطان
بترقص على طبل زار
تطوف في مزار الخبل والجنون
ومصنوع لها ناب وضرس
بيشبه كلاب الشوارع
ف حالة صَرَع
بينهش في طفل ابتدا ف الخَطَا
يا بنت الخَطَا والبدع
على غير مسمى بطاقتك
واسمك حروفك خطيئتك
عرايس خشب
ف إيد الشيطان
تخاف من شموع
شموع الحقيقة
تخاف العيون البريئة
تطوف حول بير الخطيئة
وتنسى بأن العرايس
مجرد ملابس
مهرج وحارس
يخاف الرجوع للكتاب
يخاف الغياب
يخاف القيام والجلوس
يخاف المدارس
عرايس عرايس
ف ايد الشيطان
عرايس غرور
غرور السذاجة
وشعر السماجة
يدور اسكربت الحوار
والمؤلف خواجة
تموت الأصالة
ويحيا القرف
على الحرف عالة
يعيش الخرف
عرايس خشب ف المكان
والخشب ع الكراسي ف ايد الشيطان
عرايس خشب… الشاعرة. شيماء حلمي
