أول مرة أشوف نفسي بجد
بقلم/نشأت البسيوني
في وقت غريب من العمر يحس الإنسان إنه لأول مرة بيشوف نفسه بجد يشوفها من غير تبرير ومن غير تزييف ومن غير ما يحاول يمثل القوة اللي هو مش حاسس بيها يشوفها وهي واقفة قدام مرآية الوعي اللي طول العمر كان بيهرب منها يشوف تعبه الحقيقي مش اللي كان بيضحك عليه يشوف الوجع اللي كان بيكمّمه ويقول مفيش يشوف الخسارات اللي عدّت وما كانش قادر يعترف إنها
وجعته يشوف ملامح نفسه القديمة اللي كان فاكر إنها لسه موجودة وهي في الحقيقة ماتت بدري من غير ما يودعها
وفي اللحظة دي يبدأ يستوعب إن فيه حاجات كان بيعملها مش لأنه عايزها بس لأنه اتعود عليها وإن فيه ناس كان بيتمسك بيهم مش حبا فيهم لكن خوفاً من الفراغ اللي بعدهم وإن فيه مواقف كان بيتحملها مش لأنه قوي لكن لأنه ناسي إنه يستحق يرتاح
ونسي إنه له حق إنه ينتهي من اللي بيؤذيه ويبدأ يراجع حياته كأنه بيشوف فيلم لأول مرة يشوف الأماكن اللي ضيع فيها روحه يشوف اللي استنزف طاقته وهو ساكت يشوف اللي كان بيقنع نفسه إنه طبيعي وهو مش طبيعي يشوف الوعود اللي صدقها وهي فاضية يشوف الأيام اللي مرت وهو ماشي بعين مقفولة وقلب موجوع وصوت داخلي بيصرخ وبيسكت نفسه ومع اللحظة دي يحصل
تغيير ما يتشرحش تغيير من النوع اللي ما يحتاجش إعلان ولا قرار ولا خطة تغيير هادي بس عميق خطوة ورا خطوة يبدأ يبعد عن اللي كان بيكتمه يبدأ يقرب من نفسه أكتر يبدأ يحط حدود ما كانش يحلم يحطها يبدأ يقول لاء لنفسه القديمة قبل ما يقولها للناس يبدأ يفهم إن كرامته مش رفاهية وإن راحته مش ذنب وإن قلبه مش ساحة مفتوحة لأي حد وبعد ما يشوف نفسه بجد لأول
مرة يبدأ يحبها بطريقة مختلفة حب ما فيهوش لوم ولا جلد حب مش مبني على نقص ولا احتياج حب مبني على وعي على إن كل حاجة فاته كانت درس على إن كل اللي اتمسح من حياته كان تخفيف مش خسارة على إن روحه كانت محتاجة تهدم عشان تبني من جديد ومع كل يوم يعدي في الوعي الجديد ده يبدأ الإنسان يحس إنه أخف من زمان وأوضح من زمان وأصدق مع نفسه أكتر
من أي لحظة فاتت ويبدأ يعرف إن الأيام الجاية هتكون أغلى لأن اللي هيعيشها مش نسخة مكسورة ولا نسخة خايفة ولا نسخة مجاملة اللي هيعيشها هي النسخة اللي شافت نفسها أخيرا وقررت ما تضيعش نفسها تاني
