البيت مش بيتبني بالطوب.. البيت بيتبني بالمودة والمسؤولية
بقلم الكاتبة دعاء شعبان
الزواج مش مجرد راجل وست جمعهم سقف واحد، ولا هو عقد بيتكتب وشبكة وفرح وصور بتتعلق على الحيطان. الزواج الحقيقي هو شراكة بين اتنين قرروا يبنوا حياة، ويواجهوا ظروف الدنيا بإيد واحدة، ويكون كل واحد فيهم سند للتاني وقت القوة والضعف.
الزوجة مش مجرد ست مسؤولة عن الطبخ والتنظيف وتربية الأولاد، والزوج مش مجرد شخص مسؤول عن المصاريف وتوفير الاحتياجات. البيت أكبر من تقسيم تقليدي للأدوار، وأعمق من إن كل طرف يؤدي واجبه وينتظر المقابل.
الزوجة هي روح البيت، بعطائها واهتمامها وحنانها وقدرتها على احتواء أسرتها، لكنها في الوقت نفسه إنسانة لها أحلام وحقوق واحتياجات، محتاجة التقدير والاحترام والأمان، ومحتاجة تحس إن تعبها مش واجب مفروض عليها، لكنه شيء يستحق الامتنان.
والزوج هو شريك الحياة وسند الأسرة، مش بس بمقدرته على توفير المال، لكن بمواقفه واحتوائه وتحمله للمسؤولية، وبقدرته إنه يسمع زوجته ويحترم مشاعرها ويشاركها أعباء الحياة. فالرجولة مش في إصدار الأوامر، ولا في فرض السيطرة، الرجولة الحقيقية في تحمل المسؤولية والعدل والرحمة.
البيت الناجح مش اللي مفيهوش مشاكل، لكنه البيت اللي أصحابه بيعرفوا يحلوا مشاكلهم من غير ما يكسروا بعض.
لما الزوجة تتعب، لازم تلاقي زوج يساندها، ولما الزوج يتعثر، لازم يلاقي زوجة تقف جنبه. ولما الظروف تضيق، ما يتحولش البيت لساحة لوم وعتاب، لكن يتحول لمكان يجمعهم على الصبر والتفاهم.
والأهم من كل ده إن الأولاد يشوفوا قدامهم نموذج حقيقي للحب والاحترام؛ يتعلموا إن الأب مش مجرد مصدر للمال، وإن الأم مش مجرد خادمة للأسرة، لكن الاتنين شركاء في بناء جيل سوي يعرف معنى المسؤولية والتقدير.
لا الزوج من حقه ينسى إن زوجته إنسانة لها كيان، ولا الزوجة من حقها تتجاهل إن زوجها إنسان له طاقة وقدرة وظروف.
الحياة الزوجية مش منافسة مين بيتعب أكتر، ولا مين بيقدم تنازلات أكتر، لكنها تفاهم ورحمة وتقدير متبادل.
وفي النهاية، البيت مش بيتبني بفلوس الزوج وحدها، ولا بتضحيات الزوجة وحدها؛ البيت بيتبني باتنين، كل واحد فيهم عارف إن نجاح شريكه هو نجاح للأسرة كلها.
فلا تبحث عن زوجة تخدمك، ولا عن زوج يوفر لك كل شيء فقط، ابحث عن شريك يكون معك في الحلوة والمُرّة، لأن البيوت لا تعمر بكثرة أثاثها، ولكن تعمر بقلوب تعرف كيف تحب وتحترم وتحتوي.
فالزواج مش إن اتنين يعيشوا تحت سقف واحد.. الزواج إن اتنين يبقوا سقف وأمان لبعض.
© جميع الحقوق محفوظة للكاتبة دعاء شعبان.
