حين تتصالح مع الفقد
بقلم/نشأت البسيوني
في لحظة هادية بشكل غريب تلاقي نفسك واقف قدام حاجات كانت ناقصة في حياتك قدام ناس مشيوا وأحلام ما كملتش وفرص ما اتكررتش وتبدأ تحس إن في مساحة جواك كانت مليانة أسئلة بقت دلوقتي فاضية لكن مش مؤلمة زي الأول وتكتشف إن الفقد مش دايما معناه خسارة جارحة أحياناً بيكون شكل من أشكال التصفية بيشيل منك اللي ما كانش ليك من البداية ويخليك تشوف
الحياة بشكل أهدى وأوضح حتى لو في الأول كان الوجع أكبر من الفهم وتبدأ تتذكر اللحظات اللي كنت بتقاوم فيها الغياب وتحاول تمسك في حاجات خلاص كانت بتفلت منك من غير ما تعترف لنفسك إن الإصرار أحياناً بيكون شكل من أشكال التعب وإن التمسك الزائد ممكن يوجع أكتر من الفقد نفسه ومع الوقت تفهم إنك مش لازم تعيش في حالة إنكار ولا لازم تفضل بتقارن اللي راح
باللي لسه موجود لكن المطلوب إنك تقبل إن في أشياء انتهت مش لأنك قليل ولا لأنك غلطان لكن لأن كل حاجة ليها وقتها وتلاقي إنك بدأت تبني علاقة مختلفة مع الفقد علاقة فيها هدوء بدل صراع وفهم بدل لوم ووعي بدل تمسك أعمى وده بيخليك أخف حتى لو الذكريات لسه موجودة وتكتشف إن الفقد ما شالش منك حاجة حقيقية لكنه كشف لك إيه اللي كان حقيقي فعلا وإيه اللي كان
مجرد مرور في حياتك وإنك بقيت أقدر على الاختيار وأوضح في المشاعر وأصدق مع نفسك تفهم إن التصالح مع الفقد مش نسيان لكنه سلام مع اللي حصل وإنك تقدر تكمل من غير ما تشيل الماضي كعبء على كتفك وإن الحياة تفضل ماشية حتى بعد اللي كان باين إنه نهاية كل شيء
