قصيدة البطالة العقلية من ديوان خارج الزمن للأديب .. خالد الجمال
قصيدة البطالة العقلية من ديوان خارج الزمن للأديب .. خالد الجمال
قصيدة البطالة العقلية
من ديوان خارج الزمن
للأديب الشاعر والسيناريست خالد الجمال
لما الروح بتفضي أنين
سألتك بكرة رايحين فين
قالوا الحاضر له وشين
وش بيضحك والتاني حزين
سألتك بكرة رايحين فين
رفضتك لما كنت كلام
ولا إنجاز ولا أي علام
وألقي قلوب الناس في ضلام
قلوب مجروحة وناس هايصين
سألتك بكرة رايحين فين
فين أعمالك هس سكوت
وألقي الدنيا بطعم الموت
واشغل نفسي وأنا مكبوت
وأسأل روحي سؤال واتنين
سألتك بكرة رايحين فين
ليه بتفكر إني وراك
ضدك يوم أو وياك
ألغي العقل وأكون لهواك
وأعيش في الدنيا مليش خيارين
سألتك بكرة رايحين فين
لما الليل عشش بينا
يرمي ضلامه علي أيامنا
رضينا وقولنا ليلنا قدرنا
سكنا مكانا قفلنا العين
سألتك بكرة رايحين فين
علم فينا سكون الليل
من غير صبر ضلامنا طويل
نغرق فيه ونغرق جيل
شربنا المر وكاسه حزين
سألتك بكرة رايحين فين
يأس ضربنا سلاحه متين
قطع فينا أمل وسنين
لغتنا لسانا محتلين
حتي حواسنا مش شايفين
سألتك بكرة رايحين فين
كهف عقولنا ليه مقفول
يجرح فينا يحكي يقول
من غير فكر ونبض عقول
وازاي نرضي مع الراضيين
سألتك بكرة رايحين فين
نور الفجر نور مظلوم
أصله بيجي في عز النوم
واللي يفكر لحظة يقوم
ينكر نور شيفاه العين
سألتك بكرة رايحين فين
قوم يا تاريخ افتح أبوابك
عدي النور لعقول أحبابك
بعض الناس بتموت في غيابك
واللي يفكر يوم في جنابك
بقي محسوب من المجانين
سألتك بكرة رايحين فين
دنيا بتعلا وناس نايمين
خبا ضلامهم نور العين
شايفة اليوم وناسية سنين
بكرة الطارح ع الشاطين
سألتك بكرة رايحين فين
مدن ومزارع طرق ومصانع
فجر ينور بكرة الطالع
أمن آمان في حارة وشارع
وبطالة عقلية قافلة العين
سألتك بكرة رايحين فين
فتح عينك شوف حواليك
خلي العقل اللي يواريك
ضرب وحرب ينادي عليك
أوعي تغفل لحظة عنيك
خليك صاحي مع الصاحبين
ولازم تعرف هتروح فين
ربك سبب في الأسباب
خلا وطنا ملوهشى غياب
نزرع حب نعيش أحباب
أصل شعارنا دنيا ودين
وهو دلوقتي عرفت أنا فين
تأليف الأديب الشاعر والسيناريست خالد الجمال من ديوان خارج الزمن
