. قومي يامّا
ايمن صبرى
قومي يامّا واسمعيني
ليه يا غالية هتفوتيني
وأعيش يتيم في دنيا قاسية
وأنام وأقوم على صوت أنيني
ليه يا أمي تمشي بدري
والله لسه يا غالية بدري
إنتِ نايمة يامّا قولي
وبكرة تصحي الصبح بدري؟
أفتح عنيا وأشوفني في عيونك
وأسيب شفايفي مابين جفونك
وينور زماني بنور خدودك
بكرة شمسك طالعة بدري
وقلبي يتعلق في إيدك
قولي يامّا أن إنتِ نايمة
نفس الملامح هي هي
والبسمة طارحة شايفها بعنيا
فاكرة يامّا وأنا بين إيدكي؟
في لفة بيضة جُوّا حِجرك
وعيني دايما بَصّة عليكِ
وإيدي تمسك طرف شعرك
كنتي ياما تبوسي كفي
وتشيليني جوه قلبك
كنت شايفك كل حاجة
مكنتش أعرف دنيا غيرك
وكُلّ يوم يفُوت عليّا
كنت باكبر ولا اشوفش غيرك
فاكرة لما كنت أعيط
وصوتي يِقلق راحتك ونومك
كنت تشيليني مابين كفوفك
وتواسيني بضحكة شفايفك
كنت أشوف النوم في عينك
وبرضو صاحية ترضعيني
فاكرة يامّا يوم ميلادي
لما كنتِ بتصخري
اتحملتي العذاب عشاني
وليّا كنتِ بتضحكي
فاكرة إيه ولا إيه
طيب فاكرة لما كنت يامّا تغيريلي
وتسرحيلي وتلبسيني
ولما كبرت يامّا كنتِ أول مدرسيني
كنتِ دايما تشرحيلي عن حياتي تعلميني
كنت دايما ليّا دنيا وجاية النهاردة تيتميني؟!
طب حياتي إزاي هعيشها
لو مكنتيش إنتِ هي
والليالي إزاي أنامها
لوغبتي ساعة عن عنيا
قومي يامّا واسمعني
ومن عذابي ريحييني
قومي يامّا من ثباتك
محنش لسة يوم مماتك
قومي يامّا اسمعي همسي وأنيني
قومي يامّا الدنيا داقت والقمر
هجر السما وفتني لويلي
قومي يا أم الحضن شايل دمعتي
وقلب نايم أخر كلامه دعوتي
مين يا أمي هيحس بيا بعد موتك
مين هيمسح دمعتي ويدعي بصوتك
لمين يا غالية بعدك أنتي هشتكي
همي وخزني ويشيل مكانك بلوتي
مين يا أمي في الدنيا يديني الحياة
وانتي كنتي أول وأخر وأجمل حياة
قومي يامّا وأرحميني
من عذابي ونار سنيني
