منتصف الطريق
بقلم/نشأت البسيوني
في مرحلة ما من حياتك تلاقي نفسك واقف في النص لا انت في البداية اللي فيها الحماس واضح ولا انت وصلت للنهاية اللي فيها الراحة موجودة انت في مساحة بين الاتنين مساحة مليانة تساؤلات اكتر من الإجابات ومليانة شك اكتر من اليقين
تحس انك مش عارف انت ماشي صح ولا لا ومش عارف اللي بتعمله ده هيوصلك ولا بيضيع وقتك وتبدأ تبص حواليك تلاقي
ناس سبقت وناس لسه بتبدأ وانت واقف في مكان غريب لا قادر ترجع ولا قادر تجري لقدام وتكتشف ان اصعب مرحلة مش البدايات ولا النهايات لكن المرحلة اللي بينهم المرحلة اللي لازم تكمل فيها وانت مش شايف الصورة كاملة لازم تصبر فيها وانت مش ضامن النتيجة لازم تثق وانت مش مطمن ومع الوقت تبدأ تفهم ان الوقوف في النص مش ضعف لكنه جزء طبيعي من الرحلة وان
الحيرة مش علامة ضياع لكنها دليل انك بتفكر وبتراجع وبتحاول تختار الطريق الصح مش اي طريق وخلاص وتتعلم انك ما تقارنش نفسك بحد لان كل واحد ليه وقته وليه ظروفه وليه طريقه اللي ماشي فيه وان اللي يبان لك تأخير ممكن يكون تجهيز لخطوة اكبر وانت مش شايفها دلوقتي وتبدأ تمشي بخطوات صغيرة من غير ما تستنى وضوح كامل من غير ما تستنى تطمين من حد تمشي وانت
شايل شكك وخوفك بس كمان شايل معاهم رغبة انك توصل
تفهم انك حتى وانت في النص انت بتتقدم حتى وانت محتار انت بتقرب وان الطريق ما بيبانش كله مرة واحدة لكنه بيتفتح قدامك خطوة خطوة طول ما انت مكمل
