وقت تختار نفسك
بقلم/نشأت البسيوني
في لحظة محددة الإنسان بيزهق من محاولة إرضاء الكل بيزهق من الركض وراء ناس ما بتركضش له ومن تبرير أفعال ما كانتش غلط أصلا ومن إنه يحط نفسه آخر الصف ويدي فرص للي ما يستاهلش
اللحظة دي مش لحظة غضب ولا لحظة ضعف دي لحظة وعي
تلاقي نفسك واقف قدام المراية وبتسأل سؤال بسيط أنا ليه مباختارش نفسي وتبدأ تشوف إنك طول الوقت كنت بتتنازل
علشان تحافظ على ناس ما حافظتش عليك وتسامح حاجات لو اتعملت في غيرك كنت هتنصحه يمشي وتبلع كلام وجعك علشان ما تزعلش حد كان زعلان منك قبل أصلا ما تتكلم وبعد التفكير الطويل تلاقي إن اختياراتك ليهم كانت على حساب قلبك وإن وجودك جنبهم كان بيكسر فيك وإنك كنت بتخسر نفسك شوية شوية من غير ما تحس ساعتها قرارك ما بيبقاش ثورة ولا انفعال
بيكون هدوء هدوء الوعي إن اللي بيحبك مش هيأذيك وإن اللي شايف قيمتك مش هيقلل منك وإن اللي خايف يخسرك مش هيسيبك تتوجع لوحدك وتبدأ ترجع خطوة مش هروب لكن حفاظ وترفع قيمتك مش غرور لكن احترام وتبعد مش عقاب لكن خلاص
واختيار نفسك ما هوش قسوة ولا أنانية ده أبسط حق ليك وأصدق لحظة في عمرك وقت تختار نفسك تعرف إن اللي باقي هو اللي
يستاهل واللي مشي كان لازم يمشي واللي كنت بتدور عليه برا
كان جواك طول الوقت
