حين تخذلك الحياة فجأة
بقلم/نشأت البسيوني
في لحظة ما من غير إنذار ولا سبب واضح تلاقي الحياة بتتصرف معاك بطريقة ما كنتش مستنيها تخذلك في مكان كنت شايفه أمان وتوجعك من نقطة كنت فاكرها أقوى من كده وتخليك تقف قدام نفسك وتسأل سؤال صعب هو أنا كنت متوقع زيادة ولا الدنيا فعلا بقت قاسية وتلاقي نفسك بتعيد حسابات كتير وبتراجع كل التفاصيل الصغيرة اللي عدت عليك من غير ما تفكر فيها لأن
الصدمة دايما بتفتح الباب لأسئلة عمرك ما كنت هتسألها لو ما وجعتش وتبدأ تشوف الحاجات اللي كنت مغطي عليها بحسن الظن وتشوف الناس بالشكل اللي كانوا مخبينه كويس وتشوف قلبك هو بيتهز لأول مرة وتسأل نفسك ليه كل ده بيحصل دلوقتي ليه الألم جه في أصعب وقت ليه الدنيا اختارت اللحظة اللي كنت واقف فيها على رجليك علشان تكسرها وتتعلم شيء مهم إن الحياة مش دايما
منصفة ومش لازم يبقى لكل حاجة تفسير وتبدأ تفهم إن الخذلان مش نهاية زي ما بيبان الخذلان بداية بداية وعي جديد بداية إنك تشوف الحقيقة من غير تلميع بداية إنك تتعرف على نفسك من غير أقنعة بداية إنك تبطل تجامل على حساب روحك وتقدم ناس ما استحقوش خطوة واحدة من خطواتك ومع الوقت تلاحظ إنك اتغيرت إنك بقيت أقل اعتماد على اللي حواليك وأكتر اعتماد على
نفسك بقيت أهدى في حكمك وأوضح في اختياراتك وأقرب للحقيقة اللي كنت طول عمرك بتهرب منها إن مش كل حد هيبقى سند وإن مش كل كلمة تتصدق وتكتشف إن الخذلان بيعلمك بطريقة ما حدش يقدر يعلمها وإنه رغم قسوته بيفتح جواك مساحة للنضج وبيخليك أقوى حتى لو حسيت في الأول إنك أضعف مخلوق في الدنيا وفي اللحظة اللي تفتكر فيها إنك اتكسرت فعلا
تلاقي إنك كنت بتتبني من جديد وإنك دلوقتي نسخة أصعب من إنها تتكسر بسهولة نسخة عارفة قيمتها وعارفة حدودها وعارفة إن اللي يبيعك مرة ما يستحقش حتى تسأل ليه
