شوفت

شوفت آخر فيديو ليا

قولي ماتخبيش عليا

أو تمثل مش ف بالك

أصله شافك..

وأنت بتشوفه بعينيك

يلا قول..

ولا كان مات الفضول

هو كان إمتى الأبالسه

صنف يفهم ف الأصول

طب تمام..

سيبني أقولك شوفت ايه

حتى لو كان اللي أقوله

مش مجرد غير كلام

عارف أنت شوفت ايه؟

واحدة عايشة و السلام..

ناسية بالأيام تنام

فاكرة آخر مرة حِلمت

هدّ أحلامها الكلام

شوفت لوني؟

شوفت سُهدي فوق جفوني؟

شفت دبَلاني فـ ملامحي

ولا خدعك الابتسام

شوفت دمعي لما غنّا

جوا صوتي ألف أنـّـه

عزفهم على نبض قلبي

اللي مطعون بالفراق

شوفت صورة؟

مش تحاسب ع الفاتورة

ولا لسه الطبع غالب

اللي شاري تذل فيه..

شوفت ولا تشوف زيادة

ولا فيك خزان بلادة..

مهما كان الجرح واجع

تتهمني بالجحود

يلا عود..

لم وجعي بدون وعود

امحي فيديو قديم وتافه

اوعى يوم تيجي تعاتبني

ولّا تتخطى الحدود

شوفت… بقلم الشاعر / محمود محمد