لعبة بريخت

من جملة تشبه سيجارة مشروبة

لا نار ولا دخان

ولا حتى معروبة

طالع ولد خرّوب بيعاكس الخرّوبة

ويقول لقلبه ماتقاطعش

وماتتخدعش بصُدفة أو تكرار

طول عمره تعلب وبنوصفه مكار

حبّة صوابع تشبه طوابع بريد

خمسة في كف الإيد

بيخلفوا المواعيد

ويشقّوا بيه الريق مع الشاي بالعويل

ويذنّبوه في طابور طويل

يمكن يعاين المغزى

ويلامس المأرب

يمكن يبطّل تاني يستغرب

من بنت بتغنّي ع الزراعية:

يا رب اقابل حبيبي ما استغناش

أو يفتح الجملة على البحري مايقفلهاش

عصرت نفسي بنفسي على بُق اللمونة

ماهمنيش واللهِ

طبعًا اتأثرت بس هيّ زي ماهي

حبّة تسالي فـ طريقنا قول حبّة تلاهي

اسمع معايا انتبه لكن ماتلفتش انتباهي

ما انا لو زعلت هاقوم ما اكملش القصيدة

مش قالوا سمن فـ عسل في دقيق

أسهل طريق للعصيدة

فـ اسمح لي أعجن ألت واسيبها تتصرّف معاك

وأسيبلك الأملاك اللي حتى مش ملكي

القصة دي حقيقية سمعتها مرة فـ لاسلكي

ومرتين تاني

قالتها نقطة بينالتي بتعاني م الشويطة

واقابلها جنب الحيطة بتعيّط

بس الحقيقة لسّه مش متأكد

التالتة مين مصدرها

لكنها بتعجبني من منظرها

ومن نعومة أظافري من مصغرها

باسمعها مابتكبرش وانا باكبر

صدّقني قصة إنما بودنين بس يشيلوها اربعة

فيه ودن مابتسمعش التانية كانت ضفدعة

النجمة صحيت فجأة في عينيّا فاتكبت المواعيد

على بعضها في البيد واتعوّرت قيّالة

واتصالح الشيّال مع الشيّالة بالتبعية بالتأكيد

والغيمة صبحت لص يبص م السيالة من بعيد لبعيد

على واد حزين كأنه لسّه بيعيّط

وصاحي لسّه بيمسح النضّارة

شبه السيجارة اللي بتسنّن

على ناصية جنب الحارة

سألوه عن الصلوات

قال إنه م الأموات ومش بكيفه

يعني اترفع تكليفه من سنوات

سألوه عن زراير قلبه ليه مقطوعة

ومشاعره مش مطّمنة ومخدوعة

واستغربوا ليه ضحكته مبلولة لما بتفتح

وكأنهم ما قتلوش القتيل ولا مشيوا ف جنازته

كان نفسه مرّة يحط قلبه جنب محفظته

الوقت بيهزّر والاَّ بيتألّم

ومن شباب امرأة والا طلوع سلّم

ساقوا عليه النبي لاجل النبي يتكلّم قال كل شيء بميعاد

سألوه عن الفلسفة والشعر والأوراد

فمد إيده جوّه روحه رجعت بليلى مراد

قلبي دليلي الست قالت لأ دليلي احتار

لسّه بيفتح بُقّه هيقولها

قطعوا عليه الرحيق وبحّة الأوتار

واتخانقوا على راس الكتاب

مين يفتح الصفحة ومين يقلبها مين يختار

كان وشّهم تمرين صياح في بطاقة التموين

ليستة عقاب جاهزة من واحد إلى عشرين

بين شنق صلب وخوزقة أو غرق في بيسين

أو سم بس اتحقن في العنب والتين

وفي النهاية قرروا إطلاق سراحه

منفي لصحراء من جليد

من غير ما يتغطّى بقصيدة

يفضل شريد هايم وحيد

يمكن يلاقي فـ يوم وحيدة (!)

من ديوان (كوكب الرمان).