نسيان
الشارع باظ
ابص ألاقي شباب تايه
شابّ مُخدّر… وحشيش فـ إيديه
مترنّح، مش عارف هو مين
ضاع منه الحلم…
وتكسر فيه اليقين
عيونه زغللت من سنين
مش من سهر… من وجع دفين
هرب من الواقع
في دخان،
وفاكر النسيان
فيه أمان
بس الحقيقة
إنه بيغرق
في وهم اسمه “نسيان”
وبيخسر روحه
يوم بعد يوم
وهو لسه
واقف مكانه…
والشارع باظ
والأمل بقى بضاعة نادرة
القلوب تقسى
والأخلاق في انحدار
وكلّ يوم
نخسر روح… ونكسب جدار
شباب بيضيع
في سكوت الناس،
وفي عيون سايبة
تشوف وما تتكلمش
وفي حضن مكسور
مفيهوش غير الخوف…
فيه واحد
كان ممكن يبقى طبيب
ولا مهندس…
بس اللي ربّاه الشارع
صعب يوم يبني وطن
نسيان؟
ده مش نسيان
ده إعدام بطئ
لجيل تايه
محدش قاله: “قوم… فيك أمل!”
الشارع باظ
