★فيلم الزمان ★
★عبدالرخيم طالبة صقلي
وا ردا…. ردا…
مالك زاحفة عليا يا ليام
أنا ما وليتْ نَشْبَهْ أنا
وليت صورة فلمنام
ساد عليا بين لحلام
بغيت نتكلم
لكن منين نبدا واشْ نگول
لمن نروي …لمن نحكي
هاذ لكلام
لمن نكتب حروفي لمضيومة
الدامعة على وراق ليام
بمداد التخمام
وحتى لقلام
مرة تجف وتنشف
ويصيبها لسقام
ومرة تغرقني فالطوفان
وتلف عليا العنوان
تخليني هربان
نتسابق مع زمان
راكب فوق غمامة
محمومة بالدخان
تحصد اليابس واليابس
حيت ما بقا خضر يتكال
فغضبة ليام
واش لخطا من ليام….
ولا من لغمام….
ولا من تفاحة آدم…
سؤال يتيم
جوابو الى خرج من لفام
يشبه للمسلسلات والافلام
مرة يضحكني
ؤمرة يبكيني
ؤمرة يضحك عليا
وي خليني حاط راسي على گاشوشي
نتصنت لدگان گلبي
موسد دموعي
مسلسلس روحي بحبال لحزان
مگيد السيگان
نزحف فحلقة ما عندها بيبان
حيوطها مخلطة بشلا لوان
حيط كحل ظالم ؤ مظلام
حيط يلاوحني فوسط الزحام
حيط يرجعني لعوام لفطام
حيط يتسبب ليا فالدبزة ولخصام
حيط مانعني من لحلام.
★عبدالرخيم طالبة صقلي ★
