د . محمد ضباشه ـ كاتب وشاعر
جوه عيون القمر شايفك قمر تاني
يا أرض طيبة يطيب عزفك ف وجداني
يا محنياني بحنة طِيبْهَا رباني
عشقت أنا دنيتك والأرض ويا النيل
ما انت الكتاب والهرم والسبحة والْعِمَّة
وانت الصليب والأدان يعلن صلاح أمة
وانت الجمل والجبل ما يهز فيه الريح
فيك الشقي والحمل وفيك كل جميل
مَيِّل يا ليل بالندى يحضن تراب الأرض
تطرح سنابل لقى وألقاها أم وعرض
فى حضنها نلتقى قِبْلَه وسنة وفرض
ما يميل بروحنا الهوى وتشوف معانا الويل
يا مصدرين الجهل بالعنف والإرهاب
مالكم ومال حبها للمكتوبين ف كتاب
عيون بتسهر أمن ويدين بتبدر خير
والقلب فيكوا ضرير وفاض معاه الكيل
قوموا احسبوها زمن تلقوها نبع الخير
قوموا ارفعوها وطن عن اللى عانى يشيل
قوموا اعزفوها لحن يشجي أذان الطير
تفتح لكم حضنها مصر ما غيرها بديل
أعجبني
تعليق
٠ تعليق
