ريحة شياط بقلم الشاعر / البوهالى عروب
الصمت …..
صوتي و صوتك
في لگاشوش مكتم
يجيه الليل بظلامو مسلم
ليه يحوز غماتو
حزانو ….. و شكاتو ….
آه …. و آه …….
و شحال من آه …….
في دواخلها لگلوب حاضناه
واخا ركبات لبرما عل لكسكاس
غفلة عين لقفال
و لي گالو عليه زعما عساس
فار كسكاس لحزان
و من تحت لقفال
باخ لمآسي تسرب
…. ريحة شياط ……
عطات عند ناس
شم فيا ريحة لحراگ
سولني : شكون انت
أنا واحد من ناس
مجروح بشقوف لكاس
و لكاس على يديك صابو تهراس
آش داك تشم ريحة الشياط
كيفي كيف الناس
لو مرادك تعرف شعاب الراس
راه زمانك هو زماني
و الواد لي داك ما خلاني
زاد في سآلي و عتابي :
علاش … و كفاش ….
بديت فيا نفتش عليا
لقيت راسي طفل صغير فيا
واخا عمري فوق الستين شويا
من خصاصي نتنخصص
تحگن الدمع في عيني و تگبص
لو بكيتها دمعات
تسقي الغرب و شلا غطارات
حدق في شواربي تفهم كلامي
تمعن في صمتي
تعرف واش نخبي
أنا وجع مسري
دواخلي بكاة دري
لو تشوفني ضاحك
قراني حق لقرايا
شلا را ني حامل
و معايا شلا ضحايا ……
أنا لي تخلطو لعرارم عليا
ما بقيت عارف صباح من لعشيا
صغاها لقصيدة و رد عليا
