مقالاتمنوعات

كُل العِلل دواها الرضا. بقلم/ وحيد صبري

كُل العِلل دواها الرضا

 

بقلم/ وحيد صبري

خِزَن الأيام مافيهاش دوا يشفي الوجع
يمكن اوقات كتير بنفتكر ان الحل في تغيير الظروف أو في إمتلاك شيئ ناقص،جديد ومختلف عما نملك،وساعات بنشرد بتفكيرنا لإستعادة بعض لحظات الماضي..

دايماً بنجري ورا الأسباب والحقيقة ان العِلة في الأغلب بتكون في الروح لما بتخاصم واقعها!
الأسباب والإحتمالات والألم مش هو اللي بيرهقك ،العذاب والإرهاق والشئ اللي بينهش في روحك هو مقاومة ما كُتِب لك!

عقل رافض التسليم فبيفضل في معركة خسرانة مع الزمن ومع نفسه..
هالك نفسه ومستنزف طاقته في لو كنت عملت لكان وياريت!
عتاب ولوم وتعب مستمر.

بيحرم نفسه حتى من انه يعيش اللحظة!

وهنا بيخطر في بالي حاجة واحدة بس…
سِر قديم ومنسي!
هقولك عليه يا صاحبي وصدقني..

كُل العِلل دواها الرضا
عبارة حقيقي تتبروز..

أنا عاوزك تفهمني صح،الرضا مش معناه استسلام للعجز واليأس ولا هو كمان انطفاء لشعلة الطموح،لااااا أبداً.
ده أرقى درجات الوعي والقوة..
هي دي مساحة الأمان اللي بتزرعها جواك علشان تتصالح مع ما ينقصك،وتفهم ان الحياة عمرها ما بتكون كاملة،هي بس تكمل برضاك.

قلبك بيرضا ويهدا فبتهدا المعارك والصراعات جواك وينعكس على ملامحك فتبان قوي، هادي وثابت وأقل قسوة.
عارف ومؤمن ان كُل مِحنه مِنحه …
إيمان تام وتسليم مُطلق وقلب مُطمئن أن قضاء الله وقدره هو الخير النافذ.

اكسر قيود روحك وارضى..
الرضا حياة.

زر الذهاب إلى الأعلى