اثر
بقلم/نشأت البسيوني
في اوقات كتير نحس ان كل خطوة بنمشيها بتسيب جوانا علامة يمكن محدش يشوفها غيرنا لكن رغم كده العلامات دي هي اللي بتشكل ملامح روحنا وتحدد احنا بقينا ايه وهنروح لفين يمكن ما نكونش واثقين طول الوقت ويمكن نحس ان الطريق بيمشي بينا مش احنا اللي ماشيين فيه لكن الحقيقة ان كل لحظة مرت علينا سابت اثر بيحركنا من غير ما نحس الاثر اللي جوانا مش دايم
يكون من فرح ساعات يبقى من وجع وجع يغير فينا ويهدي صوتنا ويكبر عقلنا ويخلينا نميز بين اللي يستحق واللي ما يستحقش نكتشف ان اللي كسرنا مش كسرنا فعلا بالعكس صقلنا وعلمنا نثبت اكتر قدام الايام اللي ما بترحمش ونشوف قوتنا في أماكن ما كناش نتصورها وساعات يبقى الاثر من شخص عدى في حياتنا حتى لو للحظة قصيرة شخص قال كلمة خلتنا نعيد حساباتنا او ضحكة
رجعت لنا روحنا او خيبة علمتنا نقفل ابواب ما ينفعش تتفتح تاني وهنا نفهم ان البشر بيمشوا بس اثارهم بتفضل جوه القلب لسنين طويلة معرفش ازاي بس كأنها بتتنفس جوانا والاجمل اننا مع الوقت نفهم ان احنا كمان بنسيب اثار في الحياة مش لازم تكون كبيرة مش لازم يشوفها العالم كله يكفي انها تلمس قلب حد محتاج او تخلي يوم حد اخف او تفتح باب امل بسيط وسط كل الدوشة
اللي حوالينا يمكن دي الحاجات اللي بتدي للحياة معناها اللي مش بيبان بسهولة وفي آخر التفكير ده ندرك ان كل اثر جوانا بيقربنا من نفسنا الحقيقية ويورينا الطرق اللي نكملها والطرق اللي لازم نسيبها ويخلينا نعرف ان الحياة مش سباق الحياة رحلة طويلة مليانة ملامس ومواقف واثار وكل واحدة فيهم بتقربنا خطوة من اللي احنا المفروض نبقى عليه
