ذاكرة الطريق
بقلم/نشأت البسيوني
كل طريق بتمشيه بيخزن منك حاجة حتى لو أنت فاكر إنه بس بيوصلك من مكان لمكان الحقيقة إن الطرق بتتذكر خطواتك وقراراتك ولحظات ضعفك وقوتك يمكن إحنا اللي بنفتكر النهاية بس الطريق نفسه بيحتفظ بالتفاصيل اللي محدش يعرفها غيرك
وتبدأ تلاحظ إنك لما ترجع لمكان قديم بتحس بإحساس غريب مش بس لأن المكان اتغير لكن لأن الطريق نفسه رجع قدامك بكل اللي
عديت بيه عليه وتلاقي روحك بتسترجع نسخك القديمة بكل اللي فقدته وبكل اللي كسبته وتسأل نفسك كام نسخة منك مشت في طرق مختلفة كام قرار أخذك لطريق وانت كنت تتمنى تمشي في غيره كام خطوة اتاخدت خوف مش رغبة كام خطوة اتاخدت شجاعة مش ضمان ويمكن من هنا تفهم إن الطرق مش مجرد خرائط لكنها سجلات حياة ومع الوقت تفهم إن الطريق اللي تعبك
مش دايماً كان غلط وإن اللي اتأخرت فيه كان بيجهزك لحاجة وإن المسار اللي لف بيك مش كان عشوائي وإنك لو رجعت تفكر كويس هتلاقي إن خطواتك اللي كنت فاكرها ضايعة هي اللي صنعت حكمتك الحالية وتلاقي نفسك تدرك إن الطريق اللي جاي مش لازم يشبه اللي فات وإنك مش مضطر تعيد نفس الأخطاء وإنك تقدر تختار اتجاه جديد حتى لو كل اللي حواليك شايف إنك ماشي ضد
المعتاد لأن الطريق في النهاية ملكك أنت تعرف إن أجمل الطرق هي اللي علمتك مش اللي قربتك والوصول الحقيقي مش نهاية المسافة لكنه لحظة فهمك إنك صرت إنسان مختلف عن اللي بدأ الرحلة وإن الذاكرة اللي يحتفظ بيها الطريق أهم من المكان اللي وصلت له
