كلمة السر المطر..
كلمة السر المطر
جدد الروح للشجر
تلبس الوردة
فساتين الربيع
يكتمل ضي الرجوع
تحت أنوار الشموع
واللى فاضل من دموع
يعكسه ضي القمر
وانتي يا بنت المدينة
خطوتك عارفة المطارح
والملامح ليه حزينة
يمكن امبارح
سنينك
وللا بكرة يكون حنينك
وانهاردة يلف بينا
المطر فاهم بإنك
لسة تايهة ف بحر سنك
طفلة بتخطى احتمال الإعدادية
بعد ألف نهار تكون عدت قصادي
والسؤال أنا مين وهي ؟
ضحكتك تشبه ولادي !
آه يا آخر حد مستني ف بلادي
طلتك …..
والبرق يخطف نظرتي
صرختك ….
والرعد يسرق كلمتي
ضمتك …..
واديا تحضن وحدتي
والمطر
يشبه وجودك
وقت خوفك
أو صمودك
بكرة أحلى لو هنزرع
في العيون
ضحكة ورودك
كلمة السر المطر.. كلمات الشاعرة / شيماء حلمي
