اوعى تصدق غير نفسك
بقلم/نشأت البسيوني
أصعب درس ممكن تتعلمه في حياتك إنك تكتشف إنك كنت بتكذب على نفسك عشان تصدق غيرك وإنك كنت بتدافع عن ناس جرحتك وبتخلق لهم الأعذار كل ما خذلوك وبتقنع قلبك إنهم مشغولين وإنهم تعبانين وإن الظروف هي اللي غيرتهم وإن اللي بينكم أكبر من أي غياب وأكبر من أي جرح لكن الحقيقة اللي بتوجع إنك أحيانا بتكون عارف كل حاجة من البداية لكنك بترفض تصدق لأنك بتحب
ولأنك خايف تخسر ولأنك مش مستعد تعترف إن الشخص اللي اديته الأمان كله ممكن يكون هو نفسه السبب في خوفك وإن اللي كنت بتعتبره وطن ممكن يكون أول مكان تحس فيه بالغربة اوعى تصدق كل كلمة حلوة تتقال لك ولا كل وعد يتقدم لك ولا كل شخص يحلف لك إنه عمره ما هيسيبك لأن الكلام سهل جدا لكن المواقف هي اللي بتكشف حقيقة القلوب والوقت هو اللي بيشيل
الأقنعة ويخليك تشوف الإنسان على حقيقته من غير ما تحتاج تسأله مين أنت وليه اتغيرت وليه بقيت بعيد وليه كل مرة بتخليني أحس إني تقيل عليك وأنا اللي كنت في يوم من الأيام مستعد أعمل أي حاجة عشان أشوفك مبسوط اوعى تصدق إنك قليل لمجرد إن حد ما عرفش قيمتك ولا تصدق إنك صعب لمجرد إن حد ما عرفش يحتويك ولا تصدق إنك ما تستحقش الحب لمجرد إن شخص
وعدك بالبقاء وبعدها اختار الرحيل لأن بعض الناس بيدخلوا حياتنا وهم مش عارفين قيمة اللي بين إيديهم وبعضهم ما بيكتشفش قيمة الإنسان إلا بعد ما يستهلك صبره ويكسر خاطره ويخليه يراجع نفسه ألف مرة لحد ما يبدأ يشك في قلبه وفي نيته وفي كل حاجة جميلة كانت فيه وأصعب وجع إنك توصل لمرحلة تبص فيها لنفسك في المراية وما تعرفش الشخص اللي قدامك لأنك قضيت
وقت طويل بتحاول تبقى الشخص اللي يرضي غيرك ونسيت تسأل نفسك أنت مرتاح ولا لأ أنت سعيد ولا لأ أنت لسه بتحب حياتك ولا بقيت بتعيشها لمجرد إن الأيام بتمشي كنت بتتنازل عن حاجات كتير عشان ما تخسرش حد وكنت تسكت عن الوجع عشان ما تكبرش المشكلة وكنت تبلع دموعك عشان ما تحسسش اللي قدامك إنه غلطان وكنت كل ليلة تجمع قلبك من الأرض وتقول بكرة يمكن
يتغير بكرة يمكن يفهم بكرة يمكن يحس بيا لكن بكرة كان بييجي ومعاه وجع جديد وأنت لسه بتدافع عن نفس الشخص اللي بيتسبب في تعبك لحد ما اكتشفت إنك مش محتاج معجزة عشان ترتاح أنت محتاج تبطل تخون إحساسك وتبطل تكذب على نفسك وتبطل تبرر لغيرك حاجات لو حصلت لحد بتحبه كنت أول واحد هتقوله ابعد عنه لأنك كنت شايف الحقيقة لكن الحب كان عامل
ستارة على عينيك وكان بيخليك تشوف اللي نفسك تشوفه مش اللي قدامك فعلا اوعى تصدق إن كل اللي بيضحك في وشك بيحبك ولا إن كل اللي بيقول لك أنا جنبك هيكون موجود وقت انكسارك لكن في نفس الوقت ما تخليش خذلان شخص واحد يخليك تشك في الدنيا كلها ولا تسمح لوجع قديم يحول قلبك الطيب إلى قلب قاسي أنت مش مطالب تكره الناس عشان تحمي
نفسك ولا مطالب تقفل أبوابك في وش الحياة كلها أنت بس محتاج تتعلم إن الثقة ما تتمنحش بالكلام وإن القرب مش دليل أمان وإن اللي يحبك بصدق مش هيخليك طول الوقت تتسول منه الاهتمام ولا هيخليك تحس إن وجودك عبء وإن طلبك للوضوح جريمة وإن حزنك مشكلة لازم تخبيها عشان ما تضايقوش أنت محتاج تفهم إن الحب اللي يخليك تخاف من كل كلمة وتراجع كل تصرف
وتعيش مستني لحظة هجر جديدة محتاج وقفة صادقة مع نفسك لأن الحب مش المفروض يكون سجن ولا المفروض يكون اختبارا يوميا لصبرك وتحملك وقدرتك على ابتلاع الوجع وأحيانا أقسى حقيقة إنك تكتشف إنك كنت بتحارب وحدك وإنك كنت بتحافظ على علاقة من طرف واحد وإنك كنت بتلم شتات حاجة الطرف التاني كان سايبها تقع من زمان وكنت كل ما تتعب تقول مش
مشكلة المهم ما نخسرش بعض لحد ما خسرت نفسك وأنت بتحاول تمنع خسارة شخص ما كانش بيحاول يحافظ عليك بنفس القدر وهنا لازم تقف وتبص لنفسك بعين الرحمة مش بعين اللوم لأنك ما كنتش غبيا لما حبيت وما كنتش ضعيفا لما صدقت وما كنتش قليل القيمة لما سامحت أنت كنت إنسانا بيحاول يحافظ على شيء غالي عليه لكن الخطأ الوحيد إنك فضلت تدفع من روحك تمن حاجة
المفروض إن طرفين يحافظوا عليها اوعى تصدق غير نفسك لما إحساسك يقول لك إنك تعبت ولما قلبك يقول لك إنك مش مرتاح ولما تلاقي نفسك بتتغير للأسوأ عشان ترضي إنسانا لا يرى فيك إلا ما ينقصه منك اسمع نفسك قبل ما تضيع أكتر وصدق أفعالك لما تقول لك إنك محتاج تبعد وخد وقتك في التعافي وما تستعجلش النسيان ولا تجبر نفسك على القوة كل يوم في أيام هتشتاق وفي
أيام هتضعف وفي أيام هتفتكر أجمل لحظة وتنسى كل الوجع اللي بعدها لكن افتكر إن الحنين مش دليل إن قرارك غلط وإن اشتياقك لشخص مش معناه إنك لازم ترجع لنفس المكان اللي كسرك أنت ممكن تحب وتبعد وممكن تشتاق وتختار السلام وممكن تتمنى لحد السعادة من بعيد من غير ما تسمح له يرجع يعبث براحتك من جديد لأنك في النهاية مش مطالب تثبت لأحد إنك وفي ولا إنك
بتحب بصدق ولا إنك قادر تتحمل أكثر من طاقتك أنت مطالب تحافظ على نفسك وعلى قلبك وعلى ما تبقى من روحك بعد كل المعارك اللي خضتها وحدك وفي يوم من الأيام هتفهم إن أكبر خسارة ما كانتش إن شخص مشي من حياتك لكن إنك كنت على وشك تخسر نفسك عشان تخليه يفضل وإن أعظم انتصار مش إن اللي خذلك يرجع ندمان لكن إنك تبقى بخير حتى لو عمره ما رجع
وإنك تقدر تفتكر من غير ما تنهار وتعيش من غير ما تستنى اعتذارا وإنك تعرف تنام وقلبك مطمن لأنك أخيرا بطلت تكدب على نفسك عشان تصدق غيرك اوعى تصدق إنك محتاج حد عشان تبقى كاملا ولا إن حياتك انتهت برحيل شخص ولا إن السعادة مستحيلة بعد الخذلان أنت تستحق حياة ما تضطرش فيها تشرح وجعك كل يوم وتستحق علاقة ما تخافش فيها من الغياب وتستحق ناس وجودهم
يطمنك مش يخليك تسأل نفسك كل ليلة أنا عملت إيه عشان يتغيروا عليا ولو ما لقيتش ده النهارده ما تستعجلش تدور عليه في أي قلب والسلام خليك مع نفسك لحد ما ترجع لها وخلي الأيام تعلمك من غير ما تسرق منك طيبتك لأن الطيبة مش عيب والثقة مش عيب والحب مش عيب العيب إنك تفضل تجرح نفسك عشان تحافظ على صورة جميلة لإنسان اختار بأفعاله إنه يكون بعيدا عنها
افتكر إنك مهما خسرت من الناس ما تخسرش نفسك لأن الناس ممكن تتغير والوعود ممكن تسقط والحكايات ممكن تنتهي لكنك أنت الإنسان الوحيد اللي هيفضل معاك في كل ليلة وفي كل بداية جديدة وفي كل مرة هتحاول تقوم من وجعك فكن رحيما بنفسك وصدق إحساسك وتعلم من التجربة لكن ما تسمحش لها تسرق منك قدرتك على الحب ولا على الحياة لأنك تستحق أن تعيش مطمئنا لا خائفا وأن تحب دون أن تنكسر وأن تبتعد دون أن تكره وأن تبدأ من جديد دون أن تحمل نفسك ذنب كل ما حدث لك
