خليني مني ليا
بقلم الشاعرة / بشرى الغفورى
الزمان دار ودار
ودار ورجع عليا
واخة تشوفني
بحدي راني
گالس مع راسي
مني ليا
ساكت
والعوافي
شاعلة فيا
خليني مني ليا
واش عمرك
شفتي شجرة
فالصحراء خضراء
ومسقية
ولا دار
فالهواء مبنية
مجروحة
والمواس
مرشوگة
كتقطع فيا
نضحك
ونضحك ونضحك
عليا مني
ودمعتي
على خدي
نازلة سخونة
كتگدي فيا
تبريت وتبريت
وتبريت مني
شحال
من مرة
بين ضلوعي
نغزة
كضرب فنفس
مقطوعة
واللسان بقة
داوي
وقالي
خليني
مني ليا
الدنيا خذات
نهارتي
كنبقى
سهران مع
نجوم الليل
ومضوي بالفتيلة
والقنديل
ونغزل عروقي
لي تشربكوا
المغزل تلف
نقلب ونقلب ونقلب
منين نتنفس
القلب دقاتو
خفات
والشوف ضبب
ؤتشاشا
ومني تشوش
الـضهر تعكر
والركابي فشلو
تهولت على
العروق المشربكة
لي تعكلت فطريقها
بالريةالمضرورة
سولت راسي
اش ندير
گالي خليني
مني ليا
درتها بيديا
مكمل وغادي
وفيما داتني
رجليا
ؤخليني مني ليا
