قصيدة
ظنك أيه .. ؟
من ديوان دارت الدايرة لخالد الجمال
هذه القصيدة كتبت ٢٠١٠ م
ظنك أيه .. ؟
يا بنت الليل
عيونك تضحك مرة وتبكي
دبلت فيا معاني كتيرة
وبقيتي سيرة
سيرة وسيرة
خوفت لقلبي لحظة يميل
وابقي أسير الفهم الغامض
راضي بحالي
وليه اتحدي بكرة وبعده
هو امبارح وفا بوعده .؟
ظنك أيه. ؟
احكي حكايتك في الحكايات
وارضي أكون م الأموات
لما الميت فضي حروفه
وموت خوفه
بأي لسان هيدافع عنك
روحه بتصرخ علي أعتابك
وأنت يا قادرة فايتة الصرخة
تلمي حروف كل الحكايات
ونبقي سراب الوهم الساكن
جوة قلوب ملهاش بديات
ظنك أيه .؟
تلعبي بيا وألعب بيكي
لعبة جديدة أول مرة تمر عليا وتبقي الآمرة فيها وناهية
أمرك نافد غصب عني
كل ما اغمض عيني ألقاكي
فاتحة عنيكي تبصي عليا
ظنك أيه.؟
تبقي الباقية ما هو أنت الباقية
وأنا متلصم فيكي بعافر
قبل ما يجي يوم وأسافر
أسافر منك. منك ليكي
وأنا ممدود البال وبخاطر
ظنك أيه.؟
تعشقي قلبي واعشق قلبك
كل كلام العشق باعوه
قتلوا الحب لما خانوه
مسحوا الماضي يوم ونافوه
واللي يحب بجد عادوه
ظنك أيه.؟
هو أنا عايش في المخصوص
أمد الأيد وأعبي فلوس
دا أنا مش لاقي اللقمة الناشفة
أقدم هالك تحيني بيها وتلميني تحت جناحك المكسور
ظنك أيه.؟
عمر الظن ما كان في محله
واللي يحله عاش مجنون
ظنك أيه.؟!
الأديب الشاعر والسيناريست خالد يس الجمال
من ديوان دارت الدايرة
