وجع صامت
بقلم/نشأت البسيوني
في وقت معين الانسان بيكتشف ان التعب الحقيقي مش في اللي بيحصل حواليه لكن في اللي بيحصل جواه التعب اللي مالوش صوت واللي ما حدش بياخد باله منه لان مفيش علامات واضحه عليه لكن تقله بيكون اكبر من اي حاجه ظاهره الانسان ممكن يبتسم ويتكلم ويضحك ويمشي في يومه عادي جدا لكن جواه حمل تقيل من اسئله مش لاقيه اجابه ومن احساس متراكم بقاله
سنين ومن محاولات كتير انه يكون كويس حتى وهو مش كويس
المشكله ان الوجع الصامت ده مش بيختفي مع الوقت بالعكس هو بيتراكم كل مره بنسكت فيها عن حاجه كان لازم تتقال وكل مره بنعدي موقف كان محتاج وقفه وكل مره بنقول لنفسنا عادي وهو مش عادي ومع كتر التراكم الانسان بيحس انه بقى غريب عن نفسه مش فاهم هو عايز ايه ولا ليه بقى تقيل بالشكل ده ولا ليه
الحاجات اللي كانت بسيطه بقت محتاجه مجهود كبير لكن الحقيقه ان الوجع ده مش ضعف الوجع ده اشاره ان في حاجه جواك محتاجه تتفهم مش تتدفن وانك محتاج تبص لنفسك بصدق وتديها حقها في الكلام حتى لو محدش سامع لان السكوت مش حل دايم واللي جواك لو ما خرجش بطريقه صح هيخرج بطريقه تتعبك اكتر
وفي النهايه الانسان مش بيقع من اللي حواليه الانسان بيقع لما
يسكت على نفسه كتير ولما يتجاهل وجعه لحد ما يبقى جزء منه
وقتها بس يفهم ان اقوى حاجه ممكن يعملها انه يعترف ويبدأ يصلح من جواه مش من بره
