وانتصرت حماس وانهزم الناس
فعلا انتصرت حماس وبقيت في الحكم حتى ولو على جثث الناس وانقاض منازلهم, وانهزم الشعب المغلوب على امره… انتصرت حماس واستمرت سيطرتها على هذه البقعة المقهورة من العالم والمسماه غزة,
وانهزمن أمهات الشهداء الي انحرق دمهم على اولادهم, وانهزمن بنات الشهداء الي تاهن بعد ابواتهم, وانهزمن خوات الشهداء الي انخلعت قلوبهن على اخوتهن, انهزمت كل اسرة فقدت عزيز عليها خلال هالحرب, عشان يكون الإنجاز الأول والأخير للحرب هو وقف الحرب… كانت كل الخسائر بلا ثمن..
انتصرت حماس بأفكارها ومعتقداتها ومغامراتها ومراهناتها, وانهزمت مرت الشهيد الي راح سندها وسر امانها وضمان مستقبلها, انتصرت حماس بجيش المرتزقة وعصابات التجار الفجار الي اشتغلوا تحت امرها والي تضاعفت ثرواتهم مئات المرات خلال هالحرب, الي ساعدوا حماس وقبضوا عناصرها لاخر نفس, لاخر لحظة, لاخر خيمة انقصفت في مخيم اليرموك في مدينة غزة
, وانهزم الشاب الي انقطعت رجليه وصار كسيح للأبد, والي فقد ايده وصار مشلول بقيت عمره, والي انعمى وبطل يشوف…. انتصرت حماس مع مؤيديها من ملايين الطبالين والرقاصين العرب والمسلمين حول العالم الي اتعفلوا تعفلة في دمنا وعلى جثثنا واوجاعنا, وانهزمت الناس الي خسرت كرامتها وضاعت أحلامها وانهدمت حياتها, انتصرت حماس بالاستفراد المطلق بحكم غزة مع قبضتها الحديدية شديدة الخشونة والقسوة وانحسم معاها عزل غزة بشكل مطلق,
وانهزمت مع هيك كل أحلام الناس ومعاها مات أي امل مرتبط بالوحدة الوطنية ومشروع الدولة, انتصرت حماس مع خروج ماكر وخفي لكل قياداتها العسكرية تحت اسم ” خمسين جريح مع ثلاثة من مرافقيه من مسلحي حماس يوميا” ضمن الصفقة وبالتالي تأمين حياتهم ومستقبلهم لاجيال قادمة, ومات مع هيك أي تفكير بمحاسبة او معاقبة او مراجعة أي سبب في دمار حياتنا بمغامراته ومناوراته, انتصرت حماس مع اكم باص لأكم اسير راح يطلعوا كمان اكم يوم, بتشكيلة وتوليفة مشارب ومرجعيات حزبية قمة في المكر والدهاء, وراح تعمل عليهم “شو أب” وتغطية إعلامية خرافية كالعادة, بمساندة ودعم كل اعلام الاخوان في العالم,
وراح اتسوق على كل اغبياء الكرة الأرضية انتصارها المؤزر بتحرير اسرى, وراح تبعد كل الكاميرات عن آلاف الاسر الي انشطبت بالكامل من السجل المدني وكأنهم شوية حشرات قدموهم قربان ضمن خسائر تكتيكية على مذبح الحرية…. انتصرت حماس وبقيت في الصورة محليا ودوليا, وانهزم ومات وانجرح مع انتصارها ربع مليون فلسطيني, وانهدمتم معاهم كل غزة بما فيها على روس أصحابها, انتصرت حماس بكافة استثماراتها ومواردها المالية ومشاريعها في تركيا وماليزيا وقطر وايران, وانهزم البسطاء والغلابة الي ارتموا الف سنة ضوئية في الخيام وتجرعوا فيها كل الوان الخوف والموت والقهر والحزن والذل والهوان, انتصرت حماس بالجيبات والملثمين والمسلحين الي راح يطلعوا كمان يومين في عرض عسكري مهيب ومرعب, بأسلحة وبزات عسكرية تم تكمينها وتخبأتها فقط لوظيفة واحدة ووحيدة, وهي اليوم التالي للحرب, عرض عسكري ومسير مسلح واقنعة وجعب واطلاق زخات من الرصاص الحي في الهواء امام الجميع, وظيفته الأولى والرئيسية هي خبع الناس, وارهاب وتركيع الشعب والسيطرة عليه, وإعطاء المؤيدين لحماس قبلة الحياة وحقنة النهوض والانتشاء,,, انتصرت حماس بتصدر مشهد إعادة الاعمار بملفه الميت سلفا,
والعليل والغامض أصلا, وعاد حكمها لغزة كما كان قبل السابع من أكتوبر, وزارات ووزراء ومرافقين وجيبات وبروتوكلات واستعراضات ومؤسسات تسميها حكومية وأجهزة أخرى أمنية وجمعيات في ظاهرها خيرية وشركات تطلق عليها زورا خاصة, وانهزم المواطن الغلبان الي راح يموت الف موتة عشان يدخل اله كيس اسمنت واحد لترميم بيته…
انتصرت حماس الي راح اتدير القطاع كما تشاء وكيفما تشاء, وانهزم كل من لا يدور في فلكها ومن لا يهتف لفكرها….
.
فعلا لقد انتصرت حماس وانهزم الناس…
