ظل لا يتكرر
بقلم/نشأت البسيوني
في كل مرحلة من حياتك بيعدي عليك إحساس غريب إنك مش نفس الشخص اللي كنت عليه امبارح وإنك كبرت من غير ما تحس واتغيرت من غير ما تخطط وإن النفس اللي كانت بتجري في اتجاه معين بقت النهارده واقفة في طريق جديد تماما طريق محدش ساعدك ترسمه غير التجارب اللي علمتك بالقسوة أوقات وبالحنين أوقات تانية تكتشف إنك بقيت ظل مختلف ظل ما يعرفش يرجع
للنسخة القديمة مهما حاول لأن كل خطوة وكل صدمة وكل فرح بسيط غير في جذورك من جوه خلتك قوي بطريقة ما حدش شايفها غيرك وخلاصة الكلام إنك اتشكلت من الحياة على مهل وده اللي خلى نسخه اليوم أنضج وأعمق وأجرأ تبدأ تشوف قيمتك بمعايير تانية ما بقتش محتاج رأي الناس ولا مصادقتهم عشان تثبت شيء لأنك خلاص وصلت لمرحلة الإدراك اللي فيها تعرف إن
الاستقرار مش مكان تستناه الاستقرار حالة بتبنيها جواك وإن الراحة مش في البعد ولا في القرب الراحة في صدقك مع نفسك وقدرتك تتعامل مع جروحاتك من غير ما تعاند تلاقي نفسك فجأة بتسامح أكتر من الأول مش ضعف ولا تنازل لكن لأن روحك بقت أوسع ودايرة صدرك بقت أكبر تتسع للعتاب مرة وللتجاهل مرة وللرحيل الصامت لو احتاج الأمر ولأنك فهمت إن مش كل خسارة
تستحق دمعة ومش كل غياب يستاهل تفسير وتكبر كمان لما تكتشف إنك مش محتاج تشرح نفسك لكل حد لأن اللي عايز يفهمك مش هيحتاج مقدمات واللي مش عايز مش هيفهمك مهما شرحت وتعرف إن التجاهل مش قسوة التجاهل حفاظ وإن الاهتمام مش وعد الاهتمام اختيار بيطلع من قلب صادق مش من عادة مؤقتة
تعيش يومك وانت مدرك إنك ظل لا يتكرر نسخة واحدة مش قابلة
للاستبدال ولا النسخ لأنك محصلة سنوات من السقوط والقيام من الهدايا اللي مخبيّة ومن الخسارات اللي شكلتك من الضحكات اللي أنقذتك ومن الصدمات اللي صحتك وفي الآخر تكتشف إن أعظم حاجة حصلت لك إنك اتغيرت في الوقت الصح وإنك بقيت أقوى من غير ما تعمل ضجيج وإنك وصلت لحقيقة مهمة وهي إن أجمل انت نسخة اللي ما حدش صنعها غيرك انت لوحدك
