مراجعة
بقلم/نشأت البسيوني
في وقت معين تلاقي نفسك محتاج تقف مع نفسك وقفة صريحة من غير تجميل ومن غير تبرير تبص على حياتك كأنك بتشوفها لأول مرة وتسأل السؤال اللي دايما كنت بتهرب منه هل أنا ماشي صح ولا مجرد ماشي وتبدأ تراجع تفاصيل صغيرة كنت بتعديها علاقات بتاخد منك أكتر ما بتدي قرارات أخدتها تحت ضغط عادات عشت بيها من غير ما تفكر هي شبهك ولا لا وأحلام كنت بتأجلها
كل مرة لحد ما بقت بعيدة وتسأل نفسك هو أنا بعمل ده علشان عايزه ولا علشان متعود عليه هو أنا مرتاح ولا بس متأقلم هو أنا اختياراتي نابعة مني ولا من توقعات الناس اللي حواليا ومع كل سؤال تحس إن الصورة بتوضح وإن في حاجات لازم تتغير حتى لو التغيير صعب وإن في حاجات لازم تتساب حتى لو التعلق بيها كبير وإن في حاجات لازم تبدأ حتى لو متأخر وتفهم إن المراجعة مش
جلد ذات ولا ندم على اللي فات لكنها وعي جديد بيديك فرصة تصحح طريقك وتفهم نفسك أكتر وتبني قراراتك الجاية على أساس أصدق وتبدأ خطوة خطوة تعدل تمشي من مكان مش مريح تقرب من حاجة شبهك توقف عادة بتستنزفك وتدي وقت لحاجة بتبنيك حتى لو كانت صغيرة وتلاحظ إنك بقيت أخف وإنك بتمشي بوضوح أكتر وإنك بقيتش محتاج تبرر كتير لأنك عارف أنت ليه
بتعمل كده وعارف أنت رايح فين تدرك إن المراجعة مش محطة بتقف فيها مرة وخلاص لكنها عادة بتخليك طول الوقت واعي بنفسك وماشي في طريق أقرب ليك مش لأي حد تاني
