كانوا وكنا
كانوا وكنا نصحى على الأدان
صوت أمي يقول يلا متأخرين
ألاقي أبويا قاعد مستني
شايه في إيده وبيضحك للحلوين
حضن أمي يكفي الخايفين
وصوت أبويا أمان للسهارى
ودعوتهم ستر للغلبانين
كبرنا..
كبرنا لقينا الحمل تقل
بقى فوق كتافنا حمل السنين
مبقاش في حد يقولي مالك
مبقاش في طبطبة على المجروحين
ماشيين ندور عليهم ومش ناسيين
نصور الحيطة ونسأل هما فين
نفتح دولابهم نشم ريحتهم
ونسأل الصور .. راحوا فين
فين اللي كانوا دايماً في ضهري
أسند عليهم لو وقعت سنين
فين اللي كانوا شايلين همي
قبل ما أشيل أنا هم السنين
بقينا احنا الضهر والسند
بقينا احنا الكبار الشقيانين
نضحك في وش الناس ونقول تمام
واحنا من جوه بنبكي من الأنين
كانوا وكنا .. وكنا صغيرين
دلوقتي كبرنا .. وبقينا لوحدنا
لا أمي بتنادي .. ولا أبويا مستني
بقينا احنا اللي بنقول يلا .. متأخرين
بس عزايا إني كنت ابنهم
شايل دعاهم في قلبي بين
الذكريات والأمنيات وحِكم لأبويا ياما نصحنى بيها سنين
كنت اعترض. واعمل أكنى أحكم العاقلين
كبرت يابا وعرفت .إنك كنت صح وإنى بدونك أجهل الجاهلين
ما هو دعاهم لسه .. ساترني سنين
وبدعي ربنا أشوفهم تانى في جنة رب العالمين .
كانوا وكنا… بقلم / ياسر وزيري
