اثر الغياب
بقلم/نشأت البسيوني
في لحظة معينة تدرك ان الغياب مش مجرد اختفاء شخص لكنه مساحة بتتخلق جواك من الصمت مساحة بتتسع كل يوم من غير ما تحس وبتاخد معاها جزء من طاقتك وهدوك وتركزك يمكن لان القلب بطبعه بيتمسك بالحاجات اللي الفها حتى لو ما بقتش موجودة وتحس ان الروح بتتعلق بالماضي اكتر من الحاضر وكأن الذاكرة بتفتح ابواب مقفولة من نفسها وتبدأ تلاحظ انك لسه
بتفتكر تفاصيل بسيطة كان ممكن تعدي عليك من غير ما تاخد بالك لكن دلوقتي بقت علامة ثابتة وتسمع كلمة وتشوف مكان وتلاقي قلبك بيتحرك حركة خفيفة كأنه لسه متعلق بحاجات انتهت من زمان وتسأل نفسك ليه الغياب بيوجع اكتر من الوجود ليه الشخص لما يمشي يسيب اثر اعمق من وجوده نفسه ليه بنفضل ندور على تفسير رغم ان التفسير مش هيرجع حاجة ولا هيغير النهاية
ومع الوقت تفهم ان الغياب بيكشفك لنفسك يكشف قد ايه كنت متعلق وقد ايه كنت محتاج تقول حاجات ما قلتهاش وقد ايه كنت معتمد على وجود حد اكتر من اللازم وانك محتاج تتوازن من جديد وتلاقي نفسك بتهدا وبتتعلم تتقبل الواقع زي ما هو وتعرف ان الغياب مش دايما خسارة اوقات بيكون بداية فهم بداية قوة بداية رجوعك لنفسك بعد ما كنت مشغول بغيرك اكتر مما تستحمل
تدرك ان الاثر اللي يسيبه الغياب ما بيروحش لكنه بيخف وان الوقت مش بيشيل الوجع لكنه بيعلملك تمشي بيه ومعاه ومن خلاله لحد ما توصل لنسخة اقوى من نفسك
